尋晚係農曆四月初一，為全球穆斯林更係一個神聖時刻——因為尋日亦係伊斯蘭曆九月一號，象徵一年一度的齋戒月（拉馬丹月）嘅開始。

但各地方齋戒月開始唔一定係初一。由於各地天氣不同，未必喺初一見到新月🌙，例如近日港澳地區天氣唔好，睇唔到新月，齋月就喺初二（今日）開始。

如果你有信奉伊斯蘭教嘅親戚、朋友、同事、鄰居、家傭，請尊重佢哋嘅習俗，避免喺佢哋面前飲食或日頭請人食飯，但如果你齋月喺馬來西亞、中東等地方旅行，佢哋可能會夜晚請你食開齋飯，或者可以去齋月市場掃街！想同佢哋加油打氣，可以講一聲Ramadan Mubarak，即係「齋月吉慶」啦！

另外，如果喺中東國家旅行，要注意齋月期間當地車輛開得比較快，外出時請注意交通同人身安全。

當地司機白天禁食，易疲勞，建議盡量避免坐車長途旅行，以免發生交通意外。如果確需長途旅行，應要求司機唔好開快車，同時增加中途休息次數。

（部分資料：中國駐阿聯酋大使館）

平時人來人往嘅地鐵車站，即將成為消閒娛樂好去處？呢個夢想，兩年後就會喺法國巴黎實現。

將會改建成酒吧嘅車站其實係位於巴黎第六區（左岸）、地鐵10號線塞夫爾-巴比倫站同馬比永站之間嘅幽靈車站——紅十字站（Croix-Rouge）。月台改裝完成後，將包括餐廳、市場，並擁有一張長75米嘅吧枱。

而酒吧開放時間將同地鐵首尾班車同步。根據目前營運時間表推算，應該是早上5時38分到翌日凌晨2時06分之間。

考考大家：巴黎有邊一個名勝係由火車站改建而成呢？

（文字來源：Timeout 法國；圖片來源：© Same Architectes）

各位早晨！今朝食咗早餐未呀？有冇食「皮蛋瘦肉粥」呢？
不過原來最近皮蛋喺義大利就惹到麻煩啦。
事關喺西西里島卡坦尼亞省，警方在執行食品安全巡查期間，扣起咗華人店舖內800 隻皮蛋同鹹蛋。當地警方指批皮蛋同鹹鴨蛋來歷不明，亦無符合歐盟規定嘅標籤。又形容皮蛋同鹹鴨蛋「不適合人類食用」，並強調喺義大利同歐盟都禁止出售。
其實，製作皮蛋係將鴨蛋放入鹼性物質內，一般係石灰泥或氫氧化鈉（即以前教家政嘅曾SIR成日用嘅「哥士的」）、米糠入面，擺埋一段時間之後，蛋白結成啫哩狀，顏色亦變成半透明嘅黑色。
而皮蛋特殊嘅氣味係來自蛋黃嘅主要成分——硫質（S）。經過長時間，部分蛋黃會分解變成氨基酸，並且放出好臭嘅氣體——硫化氫（H2S）。蛋黃入面其他礦物質，如鐵（Fe）、銅（Cu）、鋅（Zn）、錳（Mn）等，都會同硫化氫結合產生成硫化物，結果亦導致蛋黃變為青黑色。
至於佢松花咁嘅美麗紋路，原來係由上述嘅鹼性物質同鴨蛋中氨基酸相遇，慢慢生成氨基酸鹽（Amino salt）。
復活節就快到，版主呢個時候就會諗起復活節嘅彩繪蛋啦（pysanky）。皮蛋嘅紋路一啲都唔會輸蝕！下次打開皮蛋嘅時候不妨留意吓！

部分資源來源：LiFe 生活化學

圖片來源：Matthias Mendler, flickr. CC BY SA 2.0、下廚房

所謂「拚死食河豚」，河豚出名有毒，呢句話一方面說明河豚美味，死咗都值，另一方面又讚揚敢食河豚嘅人有勇氣。
食河豚最出名嘅日本，近年不斷研究幫河豚「脫毒」嘅方法。據英文《日本時報》報道，喺東北部岩手縣，有酒店用溫泉水養河豚，不但快高長大，而且養出嚟嘅河豚仲無係毒嘅。
據酒店表示，溫泉水含豐富礦物質，能促進河豚即使喺冬天都可以繼續生長，只需要養一年就可上市，比一般河豚提早半年。又由於溫泉河豚並非以海藻同貝殼類動物做食物，亦因此失去咗毒性。
酒店經理表示，用溫泉水養嘅河豚同野生魚一樣美味。佢又希望令呢種河豚發展成為當地特色，為振興日本東北作出貢獻。
同酒店合作、發明用溫泉水養河豚嘅公司，位於栃木縣，目的係為幫助人口減少嘅市鎮同鄉村復興。佢已經同另外十幾間公司簽咗特許經營協議，利用溫泉水養河豚，其中一處位於九州宮崎縣一間廢棄咗嘅學校。
根據日本環境省資料顯示，全日本47個都道府縣都有溫泉分佈，2016年溫泉數量超過27,000處。
（圖片來源：共同社）

鍾意坐火車遊臺灣嘅朋友，總會記得火車上香噴噴嘅飯盒（便當）。

原來舊年臺鐵賣咗超過1053萬個，即係2.3個臺灣人就買咗一盒，創歷史新高。而臺鐵除咗臺北、臺中、高雄餐廳同埋七堵車勤部、車勤花蓮分部有鐵路廚房生產便當外，3月14日更成立台東餐務室，以應付臺東車站同埋南迴線列車嘅需求量。

目前臺東餐務室主要製作60元、80元新臺幣排骨便當兩種，每天產量約在800個至1100個之間；下一步會將花蓮山豬肉等特色便當引進台東，未來唔排除開發台東特色便當。

版主：其實臺鐵素食便當最好食！

（2010年7月攝於臺東、嘉義）

提到義大利美食，好多人都會諗起義式麵食（pasta）。據統計，全義大利麵食嘅種類就有310種咁多！而每一種麵食都會有獨特嘅醬汁配搭，製作方法亦有嚴格要求。義大利不同地區嘅人都對自己家鄉麵食嘅配搭相當堅持，呢種執著係連當地政客都唔可以踐踏嘅。

喺義式麵食醬汁中，最經典嘅莫過於波隆那（博洛尼亞）的肉醬（ragù alla bolognese）了。上個月，當地市長在社交網站發文話：

「親愛的市民，講到假新聞，我喺度收集緊來自世界各地spaghetti bolognese（肉醬意粉）嘅相。呢張係來自倫敦嘅。大家有嘅話都發上嚟啦。」

肉醬意粉有假貨？問題原來在於，ragù alla bolognese係唔可以配最平常嘅spaghetti嘅。正宗嘅配搭應該係用更粗身嘅麵，例如係tagliatelle。而且整醬汁嘅時候，要落紅酒，同時唔可以落大蒜或香草，咁先係正宗。其實好多名廚做嘅肉醬，根本都係唔合格！

而更嚴格嚟講，就連個醬都唔係來自波隆那，而係附近嘅伊莫拉（Imola）。

至於政客亂「混醬」有咩後果？之前義大利副總理薩爾維尼（Matteo Salvini）將肉醬配義大利雲吞（tortellini），仲用肉腸同啤酒送，結果咪畀當地人喺網上教訓一大餐囉！因為tortellini只能夠用肉湯煮，最多只能配芝士醬或者忌廉。

（圖片來源：eataly）