新一年已經來臨。慶祝之餘，唔知道大家有冇為新一年訂立一啲計劃，令自己有所長進呢？

不如學吓外語呢？

英國《衛報》引述一家網上語言學習平台的數據，過去一年學習外語嘅英國人，增幅係其他地區嘅兩倍。當中最受歡迎嘅係法語，仲有數千計嘅人學習西班牙語、德語、義大利語或其他歐盟國家嘅語言，部分人希望可以提升語言能力，以便申請歐盟國家國籍。

平台喺英國嘅總經理指出，脫歐、疫情以至東京奧運都推動英國人學習外語：「佢哋希望喺出國旅行、做生意、或者喺國內與人相遇時，成為更好嘅世界公民。」

佢表示，報讀其網上課程嘅1500萬人中，好多都唔係要求精通，而係想達到基礎程度。其中法語課程仍然高居最受歡迎嘅前五名，顯示新嘅學習者選擇嘅動機可能係為將來旅行、經商、移民做準備，或者係想重溫學校學過嘅嘢。

其他外語學習應用程式都出現類似升幅。其中一家三月錄得巨大增幅，七成人學習西班牙語或法語，德語、義大利語同日語都比較受歡迎。

過去15年，喺英國透過正規學校課程學習外語嘅人數大幅減少。不過根據英國文化協會（The British Council）每年進行嘅語言趨勢調查顯示，2019年報考GCSE法語及西班牙語科目嘅學生人數明顯增加，不過報考A-level同樣科目嘅人數就繼續下跌。

英國文化協會又發現，即使喺學校學習外語嘅人數減少，成人學習外語嘅興致仍然高企。過去春季封城期間，英國有一成成人開始學習外語或者重新學習外語。三分一受訪者認為西班牙語是年輕人最需要學嘅外語，其次分別係法語（20%）同中文普通話（18%）。