分類彙整：節日

五一公告

聽日係五一國際勞動節。濠遊天下祝各位打工仔女節日快樂！

如果你聽日可以放假，甚至可以出去玩返幾日，恭喜你！

如果你聽日要返工，向你致敬！同時都要：恭喜你！因為今日三工！

無論你聽日放假定返工，都請記住今日我哋享有嘅各種勞工權利保障，包括強制性勞工假，都係前人犧牲、爭取嘅成果。我哋享受之餘，希望大家都可以尊重其他人嘅權利。

最後，為咗我哋同我哋嘅下一代，為咗一個更美好、更合乎公義嘅社會，大家要繼續努力奮鬥！

*****
版主聽日要返工，本版暫停更新一日。

泰國一連五日嘅國曆新年（潑水節 / 宋干節）假期將會由星期五（12日）開始。但今年喺曼谷嘅慶祝活動可能會稍為失色一啲。

因為今年5月4日至6日，將會舉行泰王拉瑪十世（哇集拉隆功）嘅加冕大典。臨近典禮準備工作中心區域嘅考山路（Khaosan Road），今年將會取消正式嘅潑水節活動。

考山路一帶商家屆時仍將照常營業，但不會提供無限量用水和彩粉。

（圖片來源：REUTERS/Soe Zeya Tun）

泰國喺星期日舉行大選。當地星期六晚六點到星期日晚六點全國將實施禁酒令。

另外，泰國疾病管制局日前亦提議要在今年宋干節（潑水節）長假第一天（4月13日）實施禁酒令。

（圖片：Designed by Vectors Market from http://www.flaticon.com）

聽日係二十四節節氣中，北半球「春分」嘅日子，即係太陽從喺黃道南到北、穿越赤道嘅日子。喺呢一日，日頭同夜晚長度係一樣嘅。

喺世界各地，唔同民族慶祝新年嘅日子都有唔同。而為伊朗人嚟講，「春分」呢一日就係新一年嘅開始，佢哋稱之為nowruz，中文譯做「納吾肉孜節」、「諾魯茲節」或「耨儒孜」。

受伊朗文化影響嘅阿富汗（波斯語係當地兩種官方語言之一）、中亞細亞、土耳其、中國嘅新疆，以至克里米亞、巴爾幹半島、印度同巴基斯坦都會慶祝呢個節日。呢一日亦係巴哈伊教嘅新年。

根據《伊朗日報》2017年嘅數字，全球有大約三億人會過波斯新年。2009年更被聯合國教科文組織列入「人類非物質文化遺產代表名錄」。

喺伊朗，「納吾肉孜節」慶祝期長達十三日。喺之前嘅星期三，當地人要先過火盤，象徵驅除厄運。

佢哋過節前同我哋過年一樣，都要大掃除、買新衫，然後將七樣有象徵性嘅物件擺上檯面，稱為「七鮮」（‎haftseen），仲要食團年飯。佢哋之後會拜訪親友，仲有諾魯茲爺爺同菲魯茲小丑派禮物畀小朋友。

最後一日要出外郊遊，避免惡運，有啲類似我哋嘅重陽節。

如果大家最近喺上述地區旅行，不妨都參加吓當地人嘅節日活動啦！

（Azita Mehran/Turmeric & Saffron）