泰國嘅清邁、清萊近年成為唔少文青嘅熱點。而喺呢兩個城市所處嘅泰國北部同老撾（寮國）一帶，有一種肉製成嘅涼拌菜，叫做larb。最近有人食咗用生肉做嘅larb，感染咗豬鏈球菌。

根據泰國《民族報》5月15號報道，當周當地已經有八名病人。喺接收咗三名病人嘅楠府醫院，副院長蓬帖表示，當地民眾鍾意食larb同埋豬紅湯，可能因為豬肉未煮熟而同受感染。

而當地每年夏季同雨季交接時，係豬鏈球菌疫情高峰期。蓬帖提醒民眾，要購買有來源品質保證而且新鮮嘅豬肉。

泰國疾病管制局統計，今年1月1日至4月28日期間，全國有超過50名豬鏈球菌感染病患，其中12人身亡。舊年全國就有338名通報案例，12人死亡。

感染豬鏈球菌可引起發燒、頭痛、嘔吐、腹瀉，暈眩失去平衡等症狀，而常見併發症包括失聰，嚴重甚至會致命。早前亦有案例需要截肢保命。而現時並冇預防豬鏈球菌感染嘅疫苗，預防方法最主要係將豬肉徹底煮熟先至進食，同埋避免傷口接觸生豬肉。

（圖片來源：泰國《民族報》）