泰國首都曼谷是國際著名的旅遊城市。湄南河貫穿市內，西岸的黎明寺（Wat Arun），即港澳地區俗稱的鄭王廟，近日推出了以寺內瓷磚圖案為主題的雪條。

繼續閱讀 曼谷黎明寺推花紋雪條 解暑之餘又可欣賞文化 →

進入夏季，喺天氣炎熱，陽光猛烈嘅時候，一支雪條、一杯冰凍飲品，可以令人心情舒暢。而喺內地，剛過去嘅「五一黃金周」期間，各大景點都推出咗獨家嘅雪條，吸引唔少旅客品嚐之餘，仲可以用嚟一個「極限」打卡！

其中喺今年國內最熱門嘅成都三星堆博物館，當地文創團隊推出咗以喺遺址中出土嘅、俗稱「娃娃頭」嘅青銅面具為造型嘅雪條，更有「青銅味」（抹茶）和「出土味」（朱古力）兩種口味。頭1200支，「五一」一個上午就銷售一空。據文創館設計師話，未來仲會陸續推出「青銅大立人」、「青銅鳥頭」等多款造型嘅雪條，仲會添加青檸、草莓等不同口味。

三星堆一炮而紅，其他地區亦都不甘示弱，例如湖北代表就有黃鶴樓雪條，湖北省博物館甚至仲有「越王勾踐劍」慕斯、「編鐘」朱克力、「弋射」蛋糕卷、「虎座鳥架」鼓提拉米蘇、「鹿角立鶴」紅絲絨蛋糕等多種甜品。而喺陝西，兵馬俑雪條當然係全國只此一家啦！

即使唔係地標建築都可以「雪條化」，例如北京就有「圓明園荷花」雪條、「故宮瑞獸」雪條、「玉淵潭櫻花」雪條、「國家博物館」文物雪條、「香山紅葉」雪條等。至於從來都係小朋友最愛嘅各種動物造型雪條，又點可以少佢哋一份呢？

講返轉頭，如果澳門要推出自己嘅景點雪條，你會覺得用邊個景點、邊種口味最能夠代表澳門呢？

小知識：極限明信片

用雪條「打卡」嘅鼻祖，相信就係「極限明信片」（maximum card），即係明信片圖案同郵票圖案屬同一類，郵票與明信片圖案位於同一面，並喺最近嘅郵政局打上郵戳。例如同北京故宮有關嘅郵票配故宮照片明信片，再去故宮郵局打郵戳。如果係藝術品，例如蒙娜麗莎，就應該去收藏畫作嘅羅浮宮最近嘅郵局打戳。

極限明信片喺集郵界已經係一個專門嘅分類。而錢幣、鈔票亦都可以作極限收藏之用。