近期喺香港吹起一陣愛「荽」風潮，「黨員」群組甚至多達34,000人！如今呢股愛「荽」風潮亦都吹到嚟澳門啦！有素食餐廳特意為各位「荽友」推出系列菜式。身為「荽友」一分子，濠記亦都上去踩場，睇吓佢哋有幾「荽」！

呢間餐廳推出咗六款菜色供各位「荽友」品嚐，我哋精選咗其中三樣，分別有啖啖芫荽新豬肉漢堡、芫荽香煎素帶子意大利麵同奶蓋特濃芫荽汁。其中奶蓋特濃芫荽汁更係海名居店限定𠻹！ 首先係義大利麵：素帶子係用雞肶菇整成，外形可以話係九成似真帶子，義大利麵除咗新鮮芫荽，仲加入咗蕃茄仔同埋果仁，令口感更豐富，而麵底雖則係採取義大利傳統青醬（pesto）嘅手法，但加入芫荽，食落居然會有緬甸椰汁雞麵嘅口味，令人十分驚奇！

啖啖芫荽新豬肉漢堡，芫荽以醬汁嘅形式存在，經過加熱味道變得溫和。再配以青瓜同生菜，中和咗偏鹹嘅新豬肉（可以參考舊年我嘅開箱文）。

至於飲品方面，奶蓋特濃芫荽汁，杯中係芫荽汁，上面係香草杏仁奶，最上面以芫荽葉裝飾，似係各位荽友嘅終極測試！不過實際飲落去，清新得嚟又唔怕有一陣臭青味，相信係一般人都接受得到。而杏仁奶甜得嚟亦相當濃郁，更係朋友至愛呀！

VEGA VEGA我行我素（海名居店）
地址：黑沙環中街海名居地下S舖
電話：28413636
營業時間：11:30 – 21:30