今日係星期一，又係農曆十五。想食素，但又唔知去邊好？又或者想嚟澳門旅行，但又唔知邊度有素食餐廳？依家有計啦！
澳門素食文化協會推出咗澳門首個網上素食地圖。呢個由義工製作嘅地圖收納咗全澳57家素食餐廳，按照中、西、泰、日式、糖水，外賣、到會、自助餐，純素、蛋奶素、五辛素等分門別類，仲提供餐廳外觀同聯絡方法。地圖仲有食材店、純素用品店，為純素朋友提供方便！ 大家快啲到「澳門素食地圖」網頁（http://www.acvmacau.org/admin/Frontend/index）或掃瞄「澳門素食地圖」嘅二維碼，食勻全澳各大素食餐廳，畀自己、畀地球一個Green Monday啦！
近期喺香港吹起一陣愛「荽」風潮，「黨員」群組甚至多達34,000人！如今呢股愛「荽」風潮亦都吹到嚟澳門啦！有素食餐廳特意為各位「荽友」推出系列菜式。身為「荽友」一分子，濠記亦都上去踩場，睇吓佢哋有幾「荽」！
呢間餐廳推出咗六款菜色供各位「荽友」品嚐，我哋精選咗其中三樣，分別有啖啖芫荽新豬肉漢堡、芫荽香煎素帶子意大利麵同奶蓋特濃芫荽汁。其中奶蓋特濃芫荽汁更係海名居店限定𠻹！ 首先係義大利麵：素帶子係用雞肶菇整成，外形可以話係九成似真帶子，義大利麵除咗新鮮芫荽，仲加入咗蕃茄仔同埋果仁，令口感更豐富，而麵底雖則係採取義大利傳統青醬（pesto）嘅手法，但加入芫荽，食落居然會有緬甸椰汁雞麵嘅口味，令人十分驚奇！
啖啖芫荽新豬肉漢堡，芫荽以醬汁嘅形式存在，經過加熱味道變得溫和。再配以青瓜同生菜，中和咗偏鹹嘅新豬肉（可以參考舊年我嘅開箱文）。
至於飲品方面，奶蓋特濃芫荽汁，杯中係芫荽汁，上面係香草杏仁奶，最上面以芫荽葉裝飾，似係各位荽友嘅終極測試！不過實際飲落去，清新得嚟又唔怕有一陣臭青味，相信係一般人都接受得到。而杏仁奶甜得嚟亦相當濃郁，更係朋友至愛呀！
VEGA VEGA我行我素（海名居店）
地址：黑沙環中街海名居地下S舖
電話：28413636
營業時間：11:30 – 21:30
近年素食文化風行全球，澳門亦都多咗好多素食餐廳。即使係一般餐廳都多咗素食選擇。
如今呢股風潮亦吹向大型連鎖快餐廳。全球最大快餐連鎖店麥當勞與Green Monday攜手合作，由聽日開始，港澳兩地麥當勞都開始供應用「新餐肉」（Omnipork luncheon）製成嘅六種菜色，分別係以15mm厚切「新餐肉」製作嘅四款早餐食品：新餐肉炒蛋堡、新餐肉蛋扭扭粉、新餐肉精選套餐同埋珍寶套餐。
至於另外兩款全日供應嘅分別係新餐肉碎蛋芝味多士，以及新餐肉蛋沙律義式飽，大家都可以喺McCafe買到。
