大家都知瑞典著名家品品牌出年會嚟澳門開分店啦！不過大家好期待嘅相信唔只係簡約風家庭用品，而係瑞典肉丸！

原來德國著名汽車品牌福士都係咁「不務正業」，最暢銷嘅產品唔係車，而係咖哩香腸（currywurst）！

根據《華爾街日報》報導，福士生產咖哩香腸已有46年歷史，而且喺十一個國家都有售賣。每條長10英吋嘅香腸超市售價10歐元（折合約91澳門元）。舊年福士就賣出650萬條香腸，仲多過全年620萬架嘅汽車銷售量。而且廠方亦非常認真，畀咗一個零件編號畀呢啲香腸，編號係199 398 500 A。

至於香腸主要材料就包括牛肉、豬肉、咖哩、胡椒、生薑等香料，但只有少數人知道香腸嘅製作秘方。有興趣嘅朋友，下次喺德國旅行不妨買返條試吓啦！

（Image by planet_fox from Pixabay）