同歐洲好多國家一樣，隨著越來越多人接種疫苗，義大利嘅疫情有放緩現象，防疫措施亦陸續放寬。當地星期二起餐廳同咖啡館重新開放內用。

不過位於義大利南部阿瑪菲海岸，有「最美懸崖小鎮」稱號嘅波西塔諾，又再出現「掠水」現象。有來自那波里嘅遊客發現，喺當地一家酒吧叫兩杯咖啡、兩杯可樂、兩枝樽裝水，盛惠46歐元！亦即係一杯可樂索價10歐元，一杯咖啡亦要10歐元，一支樽裝水都要3歐元。

事主將收據放上網，引發熱烈討論，好多人當然係話酒吧「掠水」，亦有人話喺景區消費呢個價格係「正常」。

而當地被人話「掠水」，喺疫情前都已經係咁。2013年，又有義大利國內遊客收到一張「沙律12歐元、咖啡刨冰8歐元、一樽水9歐元」嘅帳單。2019年喺首都羅馬聖天使堡附近一間咖啡館，三條熱狗、一件火腿三文治、四罐可樂，居然要119.34歐元，當中17.34歐元係貼士。事主就話：「一條熱狗收成22歐元，得一條香腸同幾根炸薯條咋。」而喺「水鄉」威尼斯，亦曾經有一杯果汁12歐元，一杯咖啡11.5歐元，一樽水10歐元嘅情形。一碟海鮮意粉可以收你120歐元，即係1170澳門元！（1歐元折合約9.75澳門元）

（平台媒體）

---

濠遊手記：

好多人話歐美消費貴，一部份當然係當地人工、稅收等因素，不過有時係你搵錯地方啫。

當年濠記喺威尼斯某著名咖啡館，見到一杯可樂都係呢個價錢！不過喺法國巴黎嘅大型超市，一罐可樂都一歐元左右啫……要預防景點「掠水」，除非喺當地有其他地方飲唔到嘅飲品，或者場所有無法替代嘅景觀或者裝修，否則如果只係想飲杯嘢解渴，搵間士多或者超市仲實際啦！

其實，有啲日常消費品，喺澳門賣嘅價錢都拍得住歐美日㗎……