嚟緊星期一（8月31日）係馬來亞獨立日，而9月16日係馬來西亞聯邦日（東西馬組成馬來西亞嘅日子）。為慶祝國家嘅生日，以馬來西亞為基地嘅亞洲航空聯同當地雪糕店，合作研製出兩種具有馬來西亞特色口味嘅雪糕。

其中一款係以當地有「國菜」之稱嘅「辣死你媽」（Nasi Lemak，即椰漿飯）為主題。在椰子雪糕內面加入椰漿飯必備嘅叄峇辣醬（sambal），再鋪上江魚仔碎同花生碎。

比較鍾意傳統嘅朋友可以選擇斑蘭糯米糕（pandan dodol）口味，將斑蘭糯米糕混入椰子雪糕，再加上烘過嘅椰絲增添香氣同質感。

兩種雪糕每款售價8.8令吉（折合約17澳門元），而且係期間限定！