上周颱風襲澳，氣象局更一度發出十號風球。而負責颱風命名嘅颱風委員會，最近亦喺第52次會議上通過咗最新颱風名稱命名表。

其中曾經喺2018年襲澳、導致澳門懸掛十號風球嘅超強颱風「山竹」被除名，由泰國提供嘅另一個名字「山陀兒」（Krathon）取代。而喺同年對中國內地造成嚴重破壞嘅「溫比亞」一同被除名，由馬來西亞提供嘅另一個名稱「普拉桑」（Pulasan）取代。

「溫比亞」就係生產西米嘅碩莪樹，而「山陀兒」係一種生果，外觀同山竹十分相似，不過顏色係橙黃色而唔係紫色嘅，可以生食或熟食。至於「普拉桑」，中文稱為葡萄桑或山荔枝，同紅毛丹有親緣關係。果實、種子都可以生食。