Tag Archives: 供應鏈

經濟, 臺灣, 飲食, 日本

全球供應鏈危機！臺日M記薯條、薯餅不保！

發佈留言

大家無論係平日趕住返工返學，或者周末唔想自己整早餐，你可能會想幫襯某大快餐連鎖店嘅早餐。不過，喺臺灣同日本，最近由於全球供應鏈危機，都出現咗薯餅、薯條缺貨嘅現象！

臺灣麥當勞尋日發出公告，指「因近期全球航運供貨不穩，餐廳薯餅陸續短缺，並將於售罄後暫時停止銷售，目前正積極調度中，預計一月下旬完成補貨，即可恢復正常供應」。不過麥當勞補充，薯條目前正常供應。

當地另一家快餐業者摩斯漢堡舊年十二月底也因國際海運壅塞，宣布暫停販售部份薯條組合商品。而肯德基、漢堡王就表示，相關產品目前都正常供應。

而喺日本，當地麥當勞繼舊年平安夜暫停售賣大、中薯條後，同樣喺尋日宣佈，聽日開始再次暫停售賣大、中薯條，為期一個月。日本麥當勞表示，由於加拿大大雪加上海上天氣惡劣，薯條進口受延誤。原本就因洪水和貨櫃短缺而營運受到嚴重影響嘅溫哥華港，狀況又因惡劣天氣而雪上加霜。公司強調，薯條貨運延誤嘅問題無法以空運克服。

有分析指出，事件同各地薯仔品質差異、氣候危機，以至Omicron疫情都有關係，而未來亞洲地區薯條供應短缺問題可能會成為常態。

（《中國時報》／《聯合報》／NOWNews今日新聞）

節日, 經濟, 美國, 飲食, 加拿大

今年聖誕變貴了！ 火雞、聖誕樹價格齊上漲

發佈留言

仲有五個禮拜就係普天同慶嘅聖誕節啦！

不過今年受到極端天氣、全球供應鏈危機等因素影響，加上新型肺炎疫情後需求增加，作為聖誕節主要嘅裝飾品聖誕樹，無論係天然樹定係人造樹，價格都有所上升。

天然聖誕樹方面，美加西部今年出現旱災，導致聖誕樹產量大減。而作為全球天然聖誕樹最大出口國嘅加拿大，西部卑詩省剛剛又受到暴雨侵襲，又影響咗國內聖誕樹供應。另外，聖誕樹種植成本亦都增加咗五成。天然聖誕樹價格預計會上漲兩成至三成。

即使要退而求其次，想購買人造聖誕樹，受供應鏈問題，包括船期延誤、航運成本上升等因素衝擊，價格亦將會上升兩成至兩成半。

而喺美國，作為感恩節以及聖誕節傳統食物嘅火雞，今年嘅價格比去年上升咗兩成，更比過去三年平均價格上升三成半。而根據美國農業事務聯合會（American Farm Bureau Federation）最新調查，今年十人份嘅感恩節大餐費用平均為53.31美元（折合約428澳門元）比去年嘅十年低位上升咗一成四。

（霍士／《財富》／《國家郵報》／CBS）