隨著數碼科技、人面辨識以及監控系統得到廣泛應用，出國旅行時以搜集各國出入境蓋章的習慣可能會逐漸消失！

馬來西亞《星報》報道，當地移民局總監凱魯表示，在耗資12億令吉的出入境綜合系統2023年啓用後，民眾出入境的護照將不再需要人手蓋章，而是以數碼掃描取代。外國旅客首次訪問馬來西亞時，也可以通過自動關卡入境大馬，而不必排隊檢查護照。

根據資料顯示，澳門已經在2013年起取消出入境蓋章的做法，改為在入境時發出一張電腦打印的入境申報表。

尋日同大家分享過有關馬介休嘅新聞。今日再同大家講吓馬介休。

尋日提過，葡國人平安夜食馬介休，係因為呢一日喺天主教傳統上係守齋戒嘅日子，即係唔食溫血動物（雞鴨鵝豬牛羊）。呢一個習俗喺同樣信奉天主教嘅義大利都有。

葡國人整馬介休有好多種方法，相傳有三百幾種，一年中每日一款都唔怕重覆。以下介紹一啲常見嘅種類。下次嚟澳門或者去葡國，想食馬介休，就唔怕唔識叫啦！

• 首先，最入門級嘅係將魚肉捏碎，混合薯仔炸成馬介休球，葡文叫做Bolinhos de bacalhau（9）。Bolinhos係「小球」咁解，「球」係Bola。
• Arroz de Bacalhau（1）就係馬介休飯。Arroz就係米嘅意思。
• Bacalhau com Todos（7）係白烚馬介休。會配烚蛋、烚薯仔、烚紅蘿蔔、烚椰菜等。Todos就係「乜都有」咁解。係里斯本人至愛。
• Bacalhau com natas（2）係忌廉（奶油）焗馬介休。葡撻嘅葡文名pastel de nata都有nata呢個詞，所以佢其實除咗蛋漿外，仲要加入忌廉。
• Bacalhau à brás（3）係薯絲馬介休。
• Bacalhau à lagareiro（5）係燒馬介休，配薯仔、炸蒜片，再淋上大量橄欖油，源自南部貝拉地區。
• Bacalhau com Broa（4）係麵包糠焗馬介休。Broa係葡國最家常嘅麵包，一般用粟米做，非常粗。
• Bacalhau à Gomes de Sá（6），高美士焗馬介休。Gomes de Sá係發明呢道菜嘅人。源自北部波圖嘅菜色。
• Bacalhau à Zé do Pipo（8），馬介休薯蓉批。Zé do Pipo係發明呢道菜嘅人。煮嘅時候加蛋黃醬。另一個源自波圖嘅菜色。

聖誕老人往日都係為大人細路帶來歡樂嘅角色。不過今年新型肺炎來襲，大大改變咗我們嘅社交模式。

喺比利時弗拉芒地區一間老人院，今個月有長者嘅子女打扮成聖誕老人探望院友，當中更有長者無戴口罩同「聖誕老人」合照。好不幸「聖誕老人」喺三日後確診新型肺炎，最終院舍有75人受感染，包括長者同職員，當中一人更因此喪生。

當然，澳門同比利時情況唔同，喺全社會努力下，目前仍然係低風險地區，甚至可以返內地旅遊無需隔離。不過希望大家放假期間，都要記得保持良好嘅衛生習慣同埋遵守社交距離呀！

祝大家聖誕快樂！

小知識：聖誕老人

聖誕老人（Santa Claus / Sinterklaas）嘅原形係公元四世紀時聖尼古拉（St Nicolas）主教，相傳佢會靜靜雞送上金錢接濟窮人。

喺普遍流行嘅講法，聖誕老人住喺北極，有人認為佢住喺芬蘭北極圈內嘅羅瓦涅米。而最初出現聖誕老人傳說嘅荷蘭（包括今次出事嘅弗拉芒地區），聖誕老人仍然係以主教裝束出現嘅。佢身邊會有一個黑人隨從，名叫「黑彼得」。而喺法國、冰島，都有各自嘅聖誕老人。而喺信奉東正教嘅俄羅斯，流行嘅係「雪老人」（Ded Moroz）同「雪姑娘」。

而信奉伊斯蘭教嘅伊朗，仍然保留咗好多前伊斯蘭文化，包括波斯新年。當中都有一個塗黑面孔、向小朋友派禮物嘅菲魯茲小丑（Haji Firuz）。