講到麥當勞，你會諗到乜嘢呢？快餐？做功課？麥難民？

但喺奧地利，呢度亦已經開始兼埋做美國公民聯絡處啦！

原來自前日開始，全奧地利194間麥當勞都可以向美國公民提供24小時熱線電話，聯絡美國駐奧地利大使館提供領事服務。但當地麥當勞唔會派駐使館人員、唔會直接提供緊急服務，亦唔會好似其他使領館咁，變成美國領土。

計劃係由美國領事官員提出嘅。奧地利麥當勞發言人表示：「首先是因為品牌喺美國人心中有巨大聲望，第二係因為佢喺奧地利分店夠多。」

（圖片來源：路透）

華人社會視魚翅為珍品，但龐大需求令全球鯊魚數量急速下降，更威脅海洋生態平衡。

世界各地日益意識到呢個問題，越來越多人都響應號召，停止食用魚翅。最近loyaltylobby網站5月6日報道，日本航空喺東京嘅貴賓室被揭發有供應魚翅湯，兩日後日航宣佈即日起永久停止供應魚翅湯，同時聲明未有在機上提供同類菜色。

（© Jeff Rotman/jeffrotman.com）

前日日本錄得今年第一次超過攝氏30度嘅高溫。有興趣去日本嘅朋友，不妨留意一下以下同夏天有關嘅詞語啦！

例如圖中提到嘅「真夏」（ま なつ ma natsu）日，係「盛夏日」嘅意思，即係一日最高溫超過30度嘅日子。而喺日本由於緯度比澳門高，超過25度已經算係「夏日」。超過35度叫「猛暑日」（もうしょび mo sho bi）。

如果夜晚最低溫超過20度、25度同30度，分別稱為「真夏夜」、「熱帶夜」（net tai ya）同「超熱帶夜」（cho net tai ya）。

日本夏天最主要嘅活動係「祭典」（祭，matsuri），例如係全國性嘅七夕、盆節（包括德島嘅阿波舞），東北三大祭典（青森睡魔祭、秋田燈竿祭、仙台七夕祭）、京都祗園祭等。大家都要著浴衣（yukata）出街，玩「花火」（煙花，hanabi）。盆節期間亦係日本人旅遊同送禮嘅旺季。

仲有，記得品嚐流水素麵（流しそうめん，nagashi somen）、喺「土用の丑の日」食鰻魚飯啦！

（圖片來源：livedoor）

五月啦！又係榴槤上市時。不過如果食完榴槤要揸車，隨時會惹禍上身！

最近喺江蘇省如東，有人喺路上被警方攔截，吹氣之後酒精濃度超標。但司機否認，話自己只係食咗「果王」榴槤。

後來司機抽血，證實咗無酒精，而警方後自己做實驗，發現食完榴槤之後吹氣確實會超標。而原因係榴槤高糖，加埋口水會發酵，產生酒精。

其實，除咗榴槤之外，荔枝、腐乳、香口膠、漱口水都會令呼氣測試失準。

另外，食榴槤禁忌有好多，其中一樣係「榴槤唔可以送酒」。咁係因為榴槤會抑制體內解酒嘅酵素乙醛去氫酶，造成越飲越醉嘅情況出現。而對糖尿病人嚟講，咁樣做更加危險，咁會令血壓同血糖升高，危害心腦血管，嚴重會引起中風或心肌梗塞。

臺裔日本人安藤百福發明即食麵，已經超過六十年。近十幾年，即食麵仲衝出亞洲，喺歐美甚至係非洲都好受歡迎。

喺美國，一位即食麵達人自2002年開始已經開設The Ramen Rater網站，品評各地嘅即食麵。喺最新公佈嘅2019年度全球十大即食麵排行榜上，新加坡百勝廚（Prima Taste）嘅叻抄拉麵連續四年名列第一。

排第二嘅係馬來西亞紅廚嘅櫻花蝦辣湯麵。

至於中國內地良呈美「biángbiáng麵」排行第三，更係中國內地生產嘅即食麵歷來最高嘅排名！

大家熟悉嘅香港壽桃牌冬蔭功拉麵同埋印尼營多撈麵仁當味分別排第九同第十。第四至第八名嘅即食麵分別來自馬來西亞、新加坡同臺灣。

（圖片來源：百勝廚）

內地啱啱結束咗「五一黃金周」假期，日本亦結束咗慶祝新天皇繼位嘅「超級黃金周」長假。

一連十日放假，唔少人出外旅遊，但對於被視為神獸嘅「奈良鹿」，就唔係一件咁舒服嘅事啦！

事關大家去親奈良，都會見吓班鹿仔，然後又用「鹿仙貝」餵佢哋。但旅客太多、餵得多、食得多就滯啦！擺喺面前、口邊都無反應。有啲就索性匿埋瞓覺去也。

醫生都話要身體健康，其中一樣就係要避免暴飲暴食，鹿仔都一樣㗎！

（圖片來源：bubble_oOoO@twitter、Brise_Marine@twitter）

尋晚係農曆四月初一，為全球穆斯林更係一個神聖時刻——因為尋日亦係伊斯蘭曆九月一號，象徵一年一度的齋戒月（拉馬丹月）嘅開始。

但各地方齋戒月開始唔一定係初一。由於各地天氣不同，未必喺初一見到新月🌙，例如近日港澳地區天氣唔好，睇唔到新月，齋月就喺初二（今日）開始。

如果你有信奉伊斯蘭教嘅親戚、朋友、同事、鄰居、家傭，請尊重佢哋嘅習俗，避免喺佢哋面前飲食或日頭請人食飯，但如果你齋月喺馬來西亞、中東等地方旅行，佢哋可能會夜晚請你食開齋飯，或者可以去齋月市場掃街！想同佢哋加油打氣，可以講一聲Ramadan Mubarak，即係「齋月吉慶」啦！

另外，如果喺中東國家旅行，要注意齋月期間當地車輛開得比較快，外出時請注意交通同人身安全。

當地司機白天禁食，易疲勞，建議盡量避免坐車長途旅行，以免發生交通意外。如果確需長途旅行，應要求司機唔好開快車，同時增加中途休息次數。

（部分資料：中國駐阿聯酋大使館）

平時人來人往嘅地鐵車站，即將成為消閒娛樂好去處？呢個夢想，兩年後就會喺法國巴黎實現。

將會改建成酒吧嘅車站其實係位於巴黎第六區（左岸）、地鐵10號線塞夫爾-巴比倫站同馬比永站之間嘅幽靈車站——紅十字站（Croix-Rouge）。月台改裝完成後，將包括餐廳、市場，並擁有一張長75米嘅吧枱。

而酒吧開放時間將同地鐵首尾班車同步。根據目前營運時間表推算，應該是早上5時38分到翌日凌晨2時06分之間。

考考大家：巴黎有邊一個名勝係由火車站改建而成呢？

（文字來源：Timeout 法國；圖片來源：© Same Architectes）

各位早晨！今朝食咗早餐未呀？有冇食「皮蛋瘦肉粥」呢？
不過原來最近皮蛋喺義大利就惹到麻煩啦。
事關喺西西里島卡坦尼亞省，警方在執行食品安全巡查期間，扣起咗華人店舖內800 隻皮蛋同鹹蛋。當地警方指批皮蛋同鹹鴨蛋來歷不明，亦無符合歐盟規定嘅標籤。又形容皮蛋同鹹鴨蛋「不適合人類食用」，並強調喺義大利同歐盟都禁止出售。
其實，製作皮蛋係將鴨蛋放入鹼性物質內，一般係石灰泥或氫氧化鈉（即以前教家政嘅曾SIR成日用嘅「哥士的」）、米糠入面，擺埋一段時間之後，蛋白結成啫哩狀，顏色亦變成半透明嘅黑色。
而皮蛋特殊嘅氣味係來自蛋黃嘅主要成分——硫質（S）。經過長時間，部分蛋黃會分解變成氨基酸，並且放出好臭嘅氣體——硫化氫（H2S）。蛋黃入面其他礦物質，如鐵（Fe）、銅（Cu）、鋅（Zn）、錳（Mn）等，都會同硫化氫結合產生成硫化物，結果亦導致蛋黃變為青黑色。
至於佢松花咁嘅美麗紋路，原來係由上述嘅鹼性物質同鴨蛋中氨基酸相遇，慢慢生成氨基酸鹽（Amino salt）。
復活節就快到，版主呢個時候就會諗起復活節嘅彩繪蛋啦（pysanky）。皮蛋嘅紋路一啲都唔會輸蝕！下次打開皮蛋嘅時候不妨留意吓！

部分資源來源：LiFe 生活化學

圖片來源：Matthias Mendler, flickr. CC BY SA 2.0、下廚房

所謂「拚死食河豚」，河豚出名有毒，呢句話一方面說明河豚美味，死咗都值，另一方面又讚揚敢食河豚嘅人有勇氣。
食河豚最出名嘅日本，近年不斷研究幫河豚「脫毒」嘅方法。據英文《日本時報》報道，喺東北部岩手縣，有酒店用溫泉水養河豚，不但快高長大，而且養出嚟嘅河豚仲無係毒嘅。
據酒店表示，溫泉水含豐富礦物質，能促進河豚即使喺冬天都可以繼續生長，只需要養一年就可上市，比一般河豚提早半年。又由於溫泉河豚並非以海藻同貝殼類動物做食物，亦因此失去咗毒性。
酒店經理表示，用溫泉水養嘅河豚同野生魚一樣美味。佢又希望令呢種河豚發展成為當地特色，為振興日本東北作出貢獻。
同酒店合作、發明用溫泉水養河豚嘅公司，位於栃木縣，目的係為幫助人口減少嘅市鎮同鄉村復興。佢已經同另外十幾間公司簽咗特許經營協議，利用溫泉水養河豚，其中一處位於九州宮崎縣一間廢棄咗嘅學校。
根據日本環境省資料顯示，全日本47個都道府縣都有溫泉分佈，2016年溫泉數量超過27,000處。
（圖片來源：共同社）