Category Archives: 鐵路

彰化車庫休整中

位於臺灣彰化市、有97年歷史嘅扇形車庫，係全臺灣唯一嘅同類車庫。

由於枕木及木棧道風化損壞嚴重，需進行枕木抽換工程，車庫自尋日（4月8日）到5月7日將暫停對外開放參觀。

大家去唔到車庫唔緊要，唔好唔記得彰化大佛、孔廟同埋電影《那些年，我們一起追過的女孩》入面嘅「精誠高中」啊！

（攝於2013年3月）

JR西日本繼同三麗鷗（Sanrio）推出Hello Kitty新幹線同埋關西機場特快Hello Kitty Haruka後再度攜手合作，推出有Hello Kitty塗裝嘅大阪環狀線・櫻島線列車。

今次特別版採用嘅係323型列車，行駛期間由4月1日到9月30日，而且塗裝列車只有一卡，出現嘅具體日期同時間亦唔會事先通知。要搭車碰著它就要碰吓運氣啦！

不過就算搭唔到，大家都仲可以喺大阪站、大阪城公園站、天王寺站及弁天町站同著上制服嘅Hello Kitty同Dear Daniel合照留念。另外仲有電子印章收集、周邊商品銷售等活動。

各位Hello Kitty嘅fans，千祈唔好錯過啦！

（部分圖片來源：維基百科）

鍾意坐火車遊臺灣嘅朋友，總會記得火車上香噴噴嘅飯盒（便當）。

原來舊年臺鐵賣咗超過1053萬個，即係2.3個臺灣人就買咗一盒，創歷史新高。而臺鐵除咗臺北、臺中、高雄餐廳同埋七堵車勤部、車勤花蓮分部有鐵路廚房生產便當外，3月14日更成立台東餐務室，以應付臺東車站同埋南迴線列車嘅需求量。

目前臺東餐務室主要製作60元、80元新臺幣排骨便當兩種，每天產量約在800個至1100個之間；下一步會將花蓮山豬肉等特色便當引進台東，未來唔排除開發台東特色便當。

版主：其實臺鐵素食便當最好食！

（2010年7月攝於臺東、嘉義）

以前一聽到坐火車坐三等車廂，你可能會有擠迫、污糟、嘈吵等印象……

不過有「歐洲花園」之稱嘅瑞士最近都有恢復三等車廂嘅提議，話要提高同大巴以及電動車之間嘅競爭力。瑞士物價出名高，三等車廂可能係遊客一大福音！

但係，瑞士公共交通聯盟主席Ueli Stückelberger就話咁做唔會慳多啲，並且會令公共交通企業工作變得更複雜。目前，他佢哋專注喺提供非高峰時段嘅平價車飛，並對2020年以前嘅車飛都設定咗一個價格上限。

喺1956年之前，瑞士最大嘅鐵路公司——瑞士聯邦鐵路（SBB CFF）係有三個等級嘅車飛：「木級」、中級同埋豪華級。豪華級車廂嘅座位鋪咗天鵝絨，並裝咗用紅木製成嘅檯仔。公司喺對《新蘇黎世報周日版》嘅書面回覆中表示，三等車廂喺目前來講「唔係問題」。

聯邦運輸辦公室表示已注意到報告建議，佢哋將會喺「必要時」將建議納入其項目同戰略入面。

而根據瑞士聯邦鐵路網站顯示，由巴塞爾去首都伯恩、69公里車程，票價要20.5瑞士法郎（折合163澳門元），而珠海去廣州132公里車程，最低票價就要60人民幣（72澳門元）。

（瑞士資訊，圖片來源：Keystone / Str）