位於婆羅洲北部嘅產油國汶萊，上月初實施伊斯蘭法，當中最具爭議性嘅係，男同性戀者要處以亂石擲死之刑。而相關法例不但適用於穆斯林、非穆斯林以及外國人，亦適用於以汶萊為註冊國嘅飛機同船隻。

事件喺歐美各國引起抗議，其中演員佐治·古尼等人發起杯葛行動，拒絕去當地旅遊並拒絕入住由汶萊擁有嘅九間酒店：

The Dorchester, London
45 Park Lane, London
Coworth Park, UK
The Beverly Hills Hotel, Beverly Hills
Hotel Bel-Air, Los Angeles
Le Meurice, Paris
Hotel Plaza Athenee, Paris
Hotel Eden, Rome
Hotel Principe di Savoia, Milano

航空業界方面，澳洲維珍航空亦宣布為確保公司成員安全，取消同汶萊皇家航空嘅員工旅遊協議。以銷售學生與青年票務為主嘅國際旅行社STA亦表明其支持多元文化以及性小眾社群嘅立場，停止銷售國營嘅汶萊皇家航空機票以及介紹任何相關行程，並將協助已購票客戶進行退票服務。

倫敦交通局（TfL）喺法例實施首日（4月3日）以「引起公眾敏感與爭議」為理由撤回汶萊嘅旅遊宣傳廣告，但臺北捷運仍然有張貼相關廣告。

金融界方面，除咗德意志銀行上月初已宣布所有員工出差唔會使用上述酒店之外，包括摩根大通、高盛、美銀、花旗集團、富瑞、摩根士丹利、野村等華爾街大行，都已禁止員工入住汶萊上述酒店。政界方面，英國警察聯合會同執政保守黨亦喺日前宣布，將取消今個月在倫敦The Dorchester舉辦嘅活動，未來亦唔再使用嗰個場地。

投資者亦呼籲同汶萊聯營石油公司嘅蜆殼，保障喺當地工作嘅性小眾員工。

但同時摩根大通聯同高盛集團以及匯豐正協助沙特阿拉伯國營石油公司「沙特阿美」發行金額高達125億美金（約1,009億澳門元）嘅鉅額債券。而沙特係全球11個將同性戀者處死嘅國家之一。

至於汶萊方面，當地駐歐盟大使4月15日致函歐洲議會，解釋當地施行相關法律案例將少之又少，因為前提是必須有至少兩名「品德高尚、伊斯蘭教信仰虔誠嘅男性」出面作證，成案門檻相當高。

長達四頁嘅信函強調，施行相關刑法目的係為「捍衛傳統、宗教同文化價值，以及家族傳承與穆斯林婚姻嘅神聖性」，因此希望歐盟各國給予「包容、尊重、理解」。

鐮倉係日本東京附近一個好受歡迎嘅旅遊城市。當地除咗有露天大佛、江之島等傳統景點之外，江之島電鐵「鐮倉高校前」站嘅平交道更由於有漫畫、廣告等加持，近年都成為遊客「打咭」必到嘅地點。

不過最近傳聞話平交道禁止攝影。事實又係點呢？

原來鐮倉市早前通過條例，希望改善好似喺馬路上拍攝阻礙交通、路軌周圍等危險地方拍攝、邊行邊食可能導致衣服污損等嘅行為（日文稱影響他人嘅行為做「迷惑行為」）。不過條條例並無罰則，目前仍然係勸導教育為主。

不過情況再惡化落去，遲吓「加辣」都唔出奇！希望大家出去旅行，無論去到邊度都好，都可以注意吓啦！

（攝於2016年12月）