大家對於薯條有咩印象呢？熱氣？漢堡包陪襯？

喺比利時，薯條（法語：frites / 荷蘭語：friet），尤其加埋青口（Moules-frites / mosselen-friet），係比利時國菜。不過受到新型肺炎影響，薯仔無人買，總共有75萬噸，係750000噸咁多！可以載滿三萬架貨車！

當地產業協會唯有呼籲國民幫手食，一個星期食兩次，以免最後要當垃圾倒咗去。

其實版主去過比利時旅行（一日咁多啦），無食到薯條，而係食當地另一種名食窩夫餅。至於青口薯條，就係喺巴黎一家連鎖餐廳食嘅（比利時、法國，甚至美國都一直爭奪薯條嘅命名權）。

比利時首都布魯塞爾係歐盟同北約嘅總部所在地，係西方政治軍事權力嘅重地。但講到當地最有名嘅「人物」，相信非「尿尿小孩」（荷蘭語：Manneken Pis，法語：le Petit Julien）莫屬了。每日都有世界各地嘅遊客到來，同佢合照留念。

最近「尿尿小孩」都跟上環保之風。一個小銅像可以點環保？咪就係佢啲「尿」囉！

原來，最近有個技工發現，自1619年銅像樹立喺呢度以來，啲「尿」係飲用水，仲直接排落下水道，年中浪費嘅食水達1,000至2,500公升咁多呀！

所以當局上星期採取行動，幫雕像加一條道管回收「尿尿」。市內其他噴泉都會跟進改善。

---

尿尿小孩前往方法：

位於布魯塞爾市中心大廣場西南、烘箱街（Rue de l’Etuve / Stoofstraat）和橡樹街（Rue du Chêne / Eikstraat）交界。自大廣場步行4分鐘即達

（2014年8月攝於布魯塞爾）