日本沖繩（琉球）星期六發生一宗車禍。一名來自臺灣嘅自駕遊司機涉嫌衝紅燈，將一名男童撞至重傷。之前香港某演員喺北海道亦撞傷咗一名警方高層。

原來外國人喺日本揸車引起車禍嘅問題，已經被稱為「觀光公害」，當地媒體早喺兩年前（2017年）就已經作過報道。

《日本經濟新聞》引述東京海上日動火災保險數據顯示，外國人發生意外機率係日本人四倍。報道指出為咗迎接明年東京奧運同殘奧，減少意外係重點工作！

日本過去五年，自駕遊數字增加了三到四成，2016年意外死亡人數高達81人，同比增加三倍。而喺外國人多、鐵路交通唔發達嘅沖繩，意外率更係全國平均四倍。

日本當局為減少外國人駕駛嘅意外，推出咗外語標示等措施，但東京海上日動屬下研究機構東京海上日動研究員風險諮詢嘅研究員指出，問題在於駕駛者嘅「交通安全及守法意識」。

根據研究發現，韓國、香港、臺灣司機喺酒後駕駛、超速同無牌駕駛比率都比日本人多幾倍到幾十倍不等。而當地租車業人士又認為外國同日本喺「意外」嘅定義有所不同，當中涉及文化習慣差異，比明文法律更麻煩。

咁點樣從文化入手？研究員指出，只能透過詳細解釋容易發生意外嘅情況，並且喺注意事項後面簽名，可大大減低意外發生。另外，租車界亦推出「外國人駕駛」嘅貼紙，但並非強制性，而且亦引發標籤外國人嘅爭議。

*****
版主：比起跟團、坐火車，自駕遊固然可以睇得多啲嘢，不過唔了解清楚當地法例同民風、唔做定功課、唔端正自己嘅駕駛態度，搞到座駕失控傷到人，唔怪得人哋覺得我哋係「迷惑」（困擾）啦！

當然，要更好咁處理涉及外國人嘅意外，就需要有更多翻譯人才幫手啦。


日經：《訪日外国人は迷惑ドライバー？　レンタカー事故が急増 》shorturl.at/lsFN0

（圖片來源：日經）

華人社會視魚翅為珍品，但龐大需求令全球鯊魚數量急速下降，更威脅海洋生態平衡。

世界各地日益意識到呢個問題，越來越多人都響應號召，停止食用魚翅。最近loyaltylobby網站5月6日報道，日本航空喺東京嘅貴賓室被揭發有供應魚翅湯，兩日後日航宣佈即日起永久停止供應魚翅湯，同時聲明未有在機上提供同類菜色。

（© Jeff Rotman/jeffrotman.com）

前日日本錄得今年第一次超過攝氏30度嘅高溫。有興趣去日本嘅朋友，不妨留意一下以下同夏天有關嘅詞語啦！

例如圖中提到嘅「真夏」（ま なつ ma natsu）日，係「盛夏日」嘅意思，即係一日最高溫超過30度嘅日子。而喺日本由於緯度比澳門高，超過25度已經算係「夏日」。超過35度叫「猛暑日」（もうしょび mo sho bi）。

如果夜晚最低溫超過20度、25度同30度，分別稱為「真夏夜」、「熱帶夜」（net tai ya）同「超熱帶夜」（cho net tai ya）。

日本夏天最主要嘅活動係「祭典」（祭，matsuri），例如係全國性嘅七夕、盆節（包括德島嘅阿波舞），東北三大祭典（青森睡魔祭、秋田燈竿祭、仙台七夕祭）、京都祗園祭等。大家都要著浴衣（yukata）出街，玩「花火」（煙花，hanabi）。盆節期間亦係日本人旅遊同送禮嘅旺季。

仲有，記得品嚐流水素麵（流しそうめん，nagashi somen）、喺「土用の丑の日」食鰻魚飯啦！

（圖片來源：livedoor）

內地啱啱結束咗「五一黃金周」假期，日本亦結束咗慶祝新天皇繼位嘅「超級黃金周」長假。

一連十日放假，唔少人出外旅遊，但對於被視為神獸嘅「奈良鹿」，就唔係一件咁舒服嘅事啦！

事關大家去親奈良，都會見吓班鹿仔，然後又用「鹿仙貝」餵佢哋。但旅客太多、餵得多、食得多就滯啦！擺喺面前、口邊都無反應。有啲就索性匿埋瞓覺去也。

醫生都話要身體健康，其中一樣就係要避免暴飲暴食，鹿仔都一樣㗎！

（圖片來源：bubble_oOoO@twitter、Brise_Marine@twitter）

鐮倉係日本東京附近一個好受歡迎嘅旅遊城市。當地除咗有露天大佛、江之島等傳統景點之外，江之島電鐵「鐮倉高校前」站嘅平交道更由於有漫畫、廣告等加持，近年都成為遊客「打咭」必到嘅地點。

不過最近傳聞話平交道禁止攝影。事實又係點呢？

原來鐮倉市早前通過條例，希望改善好似喺馬路上拍攝阻礙交通、路軌周圍等危險地方拍攝、邊行邊食可能導致衣服污損等嘅行為（日文稱影響他人嘅行為做「迷惑行為」）。不過條條例並無罰則，目前仍然係勸導教育為主。

不過情況再惡化落去，遲吓「加辣」都唔出奇！希望大家出去旅行，無論去到邊度都好，都可以注意吓啦！

（攝於2016年12月）

自去年非洲豬瘟從俄羅斯傳入中國內地以來，至今年4月，疫情已擴散至內地所有省市區。
據臺灣中央社引述日臺交流協會消息指，自今日（4月22日）起，日本農林水產省將嚴格處理違法攜帶畜產品，在任何情況下（包括個人消費或手信），若查獲違法攜入畜產品， 依據日本家畜傳染病預防法，將裁罰100萬日圓（折合72,192澳門元）以下罰金或3年以下徒刑。
根據日本農林水產省網站公告，22日起對從海外違法攜帶肉品將進行嚴格處理，只要行李中被查獲未申報的肉品等畜產品，都是罰則處罰的對象。
（圖片來源：Icon made by Freepik from http://www.flaticon.com）

下個月日本就要迎接新天皇同埋「令和」新年號。除咗錢紙要印上新年號，就連設計都會變身！

日本政府今日宣布，一千、五千同一萬日元新鈔的圖樣，大家熟悉嘅福澤諭吉將退出一萬日元封面，由創立第一國立銀行，東京證券交易所嘅澀澤榮一取代。

五千日元繼續由女性擔綱，由創立津田塾大學嘅津田梅子取代作家樋口一葉。而一千日元就由醫學家、細菌學家北里柴三郎取代另一位醫學家野口英世。

新鈔發行嘅主要目的在於防偽。新鈔2024年上半年起陸續發行。另外，同樣具有新防偽技術嘅新版500日圓預計會喺2021年上半年起陸續發行。

至於2000日元設計就唔會改變。

之前大家都講緊塑膠對於海洋生物嘅傷害，其實塑膠垃圾對陸上動物都好危險！

日本《朝日新聞》尋日報道，喺奈良公園出沒、深受遊客喜愛嘅奈良鹿，都成為塑膠嘅受害者。

喺上個月23號有路人通報，表示「東大寺附近有鹿無法起身」。呢隻大約17歲、重30公斤、長79公分嘅雌鹿隨後被送去保護，但喺第二日上晝就死咗啦。「奈良之鹿愛護會」27號對鹿屍進行解剖，喺胃入面發現重3.2公斤嘅異物，據研判係膠袋纏繞所形成嘅聚積物。

愛護會獸醫丸子理惠話：「虛弱嘅鹿胃入面有垃圾，雖然會有咁嘅情況發生，但很少會出現咁多垃圾。呢隻鹿可能係因年紀大而衰老，不過佢體型好瘦，毛色亦唔好。」佢估計應該係胃內面塞住膠袋，令隻鹿無法攝取足夠養分。

（攝於2017年1月，非受害動物）

日本尋日宣佈咗新天皇採用嘅年號為「令和」，好多人都熱烈討論年號嘅來源同埋含意。由於日本同中國嘅複雜關係，版主基於求真精神，做咗啲資料搜集，先寫呢一篇帖文。

首先，「令和」二字，和字可以表示「和平」，亦係日本主要民族嘅自稱「大和」。而令字除咗代表「命令」，亦有「美好」嘅意思，例如成語「巧言令色」，「令」喺呢度如果唔係指「美好」，意思係會對唔上嘅。

正如大家所知，「令和」嘅典故係《萬葉集》嘅「初春令月，氣淑風和」，係日本第一次唔用中國典籍作為天皇年號。之前天皇嘅年號，唔係《史記》，就係《尚書》一類儒家經典。

《萬葉集》雖則係日本最早嘅詩集，但你打開一本《萬葉集》（當然係日文版啦），會發現有啲句子一般華人會睇得明（「初春令月」一句就屬於呢一種），而其他部分都係漢字，但讀落就好似天書咁。

咁係因為正文只係用漢字嚟標示日文發音，已經脫離咗中文嘅意思，即「萬葉假名」，係我哋熟悉嘅「平假名」同「片假名」嘅祖先。《萬葉集》成書於八世紀，係日本學習唐朝嘅高峰期，而且在理嚟講，外來文化由照抄、適應到自創都係需要過程嘅。

另一方面，好多人都已經發現相關詞句喺中國好多古典文獻都有，例如東漢張衡嘅《歸田賦》：「於是仲春令月，時和氣清」，而「氣淑風和」就有可能化用自東晉王羲之《蘭亭集序》：「天朗氣清，惠風和暢」。咁亦唔出奇，畢竟日本、朝鮮半島、越南等都係漢字文化圈嘅成員，但文化上後來都各自發展。日本首相安倍晉三喺記者會上話新年號「蘊含了在人們的美麗心靈相互靠近之中，文化誕生並成長的意思」，可謂係最好嘅註腳。

而實際嚟講，今次唔係天皇駕崩導致更改年號，有條件提前公佈新年號。但好有趣嘅係，根據共同社報道，日本保守派反而唔贊成咁做，怕有新舊天皇出現「雙重權威」嘅問題，最終安倍晉三以實用為主，決定尋日公佈新年號。

無論如何，新年號象徵住新時代嘅來臨，好多嘢，例如日曆、錢幣、電腦系統等，都需要跟住變，「平成」將會活在人們嘅記憶當中。日本天皇喺日本憲法下、作為「國民統合」嘅象徵，相信亦都係唔會改變嘅。希望日本喺新天皇帶領下，能繼續同其他國家，特別係亞洲鄰國，維持和平友好嘅關係。

（圖片來源：維基共享資源）