Category Archives: 攻略

珠三角, 節日, 飲食, 大灣區, 廣東, 攻略, 文化遺產, 植物, 中國內地

濠遊大灣區：小欖菊花會

發佈留言

秋天最具代表性嘅花當然就係菊花啦！原來過關坐城際只需36分鐘，就可以欣賞到有超過200年歷史、被列入第一批國家非物質文化遺產嘅小欖菊花會啦！

位於中山市西北部嘅小欖鎮，南宋末年就已經開始有種植菊花。到清朝乾隆年間更開始出現菊花會，尤其是每逢甲戌年規模更加盛大。不過下次有咁大規模嘅菊花會就要等到2054年啦！

今年小欖菊花會嘅會場，佔地350畝，展出咗25個大型造景、共25萬盆菊花。入面嘅菊花有不同品種，亦有各種嘅造型，好似係製成盆栽咁嘅樣，亦有一啲做到好似孔雀開屏咁樣，或者造成瀑布一瀉千里嘅效果。當地各大企業同埋鄉鎮社區亦都設計出不同造景，實行宣傳自己。同場亦都有其他花卉展出，包括係近年喺澳門相當受歡迎嘅向日葵花田，呢度亦都有。

菊花同中國人有着好深厚嘅淵源，亦都產生咗好多同菊花有關嘅文化。會場有花藝比賽展覽，亦都有售賣各種用菊花製成嘅食品。成年人當然可以品嚐傳統嘅菊花酒，想一試新奇嘅亦都可以嘗試菊花刺身。

嚟中山當然要試吓當地嘅美食啦！中山最出名嘅就係石岐乳鴿啦。朋友介紹咗一間位於石岐一間好出名嘅餐廳，好多港澳人都慕名而來。

坐低叫咗一隻滷水乳鴿（RMB22）同埋一個北菇雞煲仔飯（RMB18）。呢個價錢已經十分懷舊。一上枱更加驚艷！乳鴿係新鮮貨色，一咬入面滾湯嘅肉汁就噴出嚟。的確係唔同啲！煲仔飯嘅飯焦亦都非常可口，好容易就食得乾乾淨淨！

大家不妨可以趁花會嘅時候行一趟中山，最好就兩日一夜：早上去參觀菊花會，欣賞同場舉辦嘅第12屆中國民間藝術節，下午喺石岐食午飯行街，夜晚去三鄉浸溫泉，消除疲勞！

2020年小欖菊花會＋第12屆中國民間藝術節
展期至12月13日
時間：
週一至週五上午9時至晚上10時
週六週日上午9時至晚上10:30
門票：
週一至週五RMB20
週六週日RMB30
微倍提前24小時購票更可獲優惠
交通：
珠海站—（廣珠城際）—小欖站（票價RMB40）
轉乘專車（每15至20分鐘一班，票價RMB2）

煲煲掂西區店
中山市西區下閘新村2棟106號
（中山一路維也納酒店直入）

珠海, 攻略

乘最新觀光巴士 舒適遊珠海

發佈留言

嘩！自3月25日香港對澳門實施強制檢疫以來，濠仔超過半年都冇離開澳門啦！

最近濠仔終於有時間，可以出關啦。而最近珠海都有啲新玩意、新玩法，當然都要同大家介紹吓！

好似珠海喺上月底推出咗觀光巴士，濠仔一於同大家試試車！

巴士目前有一條營運路線，由拱北口岸總站出發，大致沿情侶路行駛，途經港珠澳大橋珠海口岸、珠海漁女、日月貝等景點。

行駛觀光路線嘅巴士係雙層設計，上層更有全天窗，欣賞沿途景色一流！每架車都有不同主題，例如親子遊樂、島嶼風光等等。

車上服務方面，一上車就有接待員小姐照顧大家，十分貼心。車廂內全空調，座位採用真皮座椅，十分舒適。車上更有冰凍飲品和紀念品售賣、多語言景點介紹、觸控導賞屏、5G訊號幅蓋以及虛擬實境體驗。

巴士目前採用微信售票，只要關注「珠海觀光巴士」帳號即可購票。不過目前仍然未能提供支付寶等其他支付方式，希望公司可以盡快改善。

至於大家最關心嘅票價問題，單程票推廣期內每張5元人民幣。個人建議購買一日票，15元任坐。只需要坐三次車就可以回本。其實來回兩程，再加中間停留一個點就夠啦！

珠海觀光巴士
營運時間：上午9時至晚上8時，每30分一班

假期, 攻略, 澳門

2020請假攻略：澳門篇

發佈留言

政府啱啱公佈咗明年公眾假期時間表！濠遊天下第一時間同大家分享來年請假攻略！

【2020請假攻略：澳門篇】政府啱啱公佈咗明年公眾假期時間表！濠遊天下第一時間同大家分享來年請假攻略！

明年公共假期，最多人關心嘅相信係農曆年同埋復活節，因為呢兩個假期都係浮動嘅。

明年農曆大年初一係1月25號星期六。根據澳門法例規定如果公眾假期喺星期六、日，公共行政工作人員係可以豁免上班，即所謂嘅「補假」，變相又多咗假期。所以明年農曆年，係可以放到1月29號（大年初五）。只要請埋1月30同31號，加埋除夕半日，就可以放9.5日啦（1月24日下午至2月2日）！初三赤口想出東南亞去玩吓或者避年都綽綽有餘！

至於復活節就會喺4月12號，而今年清明節係4月4號，係星期六，4月6號星期一補假，又可以串埋一齊，實行「請三放十」（4月4日至13日）啦！如果星期五晚去到香港機場，可以去個歐洲十日都得！

澳門人一到十二月就充滿holiday mood，因為淨係公眾假期就有12月8號聖母無原罪瞻禮、20號回歸紀念日、21或22號冬至、24同25號聖誕節。好消息係出年回歸紀念日係星期日，而冬至喺21號，即係話只需要請23號，就可以由19號放到27號，即係「請一放九」！請埋28到31號上午，仲可以放到1月3號，「請4.5放十六」！認真和味呀！

至於今年聖誕，由於冬至係星期日，星期一補假，所以可以連放六日，想再自製長假，最少請多三日半就可以放到十三日假！

出年十月尾亦可以「請四放十」：重陽節係星期日，會補假，而且貼近11月2號追思節（星期一）。過咗國慶，人流較少，而且秋高氣爽，最適合去返內地行吓山。

至於其他長周末仲包括：佛誕+勞動節超長周末（4/30-5/3），以及國慶+中秋節翌日超長周末（10/1-5）。