尋日同大家介紹過日本城堡明年可以提供住宿服務，今日又介紹另一種特色住宿。

今次係美國著名嘅連鎖快餐店、主打美墨菜嘅塔可鐘（Taco Bell），酒店選址位於加州棕櫚泉（Palm Springs）。酒店將於8月9號開業。

話得明係餐廳開設嘅主題酒店，當然會有主題房間、池畔雞尾酒、特色商店同髮廊。而且酒店提供嘅餐廳菜色，都係酒店先有咋！

但酒店「經營期有限」，酒店將於六月起接受預訂。有興趣嘅朋友就要趁早啦！

酒店網頁
https://www.tacobell.com/the-bell-hotel

講到麥當勞，你會諗到乜嘢呢？快餐？做功課？麥難民？

但喺奧地利，呢度亦已經開始兼埋做美國公民聯絡處啦！

原來自前日開始，全奧地利194間麥當勞都可以向美國公民提供24小時熱線電話，聯絡美國駐奧地利大使館提供領事服務。但當地麥當勞唔會派駐使館人員、唔會直接提供緊急服務，亦唔會好似其他使領館咁，變成美國領土。

計劃係由美國領事官員提出嘅。奧地利麥當勞發言人表示：「首先是因為品牌喺美國人心中有巨大聲望，第二係因為佢喺奧地利分店夠多。」

（圖片來源：路透）

華人社會視魚翅為珍品，但龐大需求令全球鯊魚數量急速下降，更威脅海洋生態平衡。

世界各地日益意識到呢個問題，越來越多人都響應號召，停止食用魚翅。最近loyaltylobby網站5月6日報道，日本航空喺東京嘅貴賓室被揭發有供應魚翅湯，兩日後日航宣佈即日起永久停止供應魚翅湯，同時聲明未有在機上提供同類菜色。

（© Jeff Rotman/jeffrotman.com）

前日日本錄得今年第一次超過攝氏30度嘅高溫。有興趣去日本嘅朋友，不妨留意一下以下同夏天有關嘅詞語啦！

例如圖中提到嘅「真夏」（ま なつ ma natsu）日，係「盛夏日」嘅意思，即係一日最高溫超過30度嘅日子。而喺日本由於緯度比澳門高，超過25度已經算係「夏日」。超過35度叫「猛暑日」（もうしょび mo sho bi）。

如果夜晚最低溫超過20度、25度同30度，分別稱為「真夏夜」、「熱帶夜」（net tai ya）同「超熱帶夜」（cho net tai ya）。

日本夏天最主要嘅活動係「祭典」（祭，matsuri），例如係全國性嘅七夕、盆節（包括德島嘅阿波舞），東北三大祭典（青森睡魔祭、秋田燈竿祭、仙台七夕祭）、京都祗園祭等。大家都要著浴衣（yukata）出街，玩「花火」（煙花，hanabi）。盆節期間亦係日本人旅遊同送禮嘅旺季。

仲有，記得品嚐流水素麵（流しそうめん，nagashi somen）、喺「土用の丑の日」食鰻魚飯啦！

（圖片來源：livedoor）

五月啦！又係榴槤上市時。不過如果食完榴槤要揸車，隨時會惹禍上身！

最近喺江蘇省如東，有人喺路上被警方攔截，吹氣之後酒精濃度超標。但司機否認，話自己只係食咗「果王」榴槤。

後來司機抽血，證實咗無酒精，而警方後自己做實驗，發現食完榴槤之後吹氣確實會超標。而原因係榴槤高糖，加埋口水會發酵，產生酒精。

其實，除咗榴槤之外，荔枝、腐乳、香口膠、漱口水都會令呼氣測試失準。

另外，食榴槤禁忌有好多，其中一樣係「榴槤唔可以送酒」。咁係因為榴槤會抑制體內解酒嘅酵素乙醛去氫酶，造成越飲越醉嘅情況出現。而對糖尿病人嚟講，咁樣做更加危險，咁會令血壓同血糖升高，危害心腦血管，嚴重會引起中風或心肌梗塞。

臺裔日本人安藤百福發明即食麵，已經超過六十年。近十幾年，即食麵仲衝出亞洲，喺歐美甚至係非洲都好受歡迎。

喺美國，一位即食麵達人自2002年開始已經開設The Ramen Rater網站，品評各地嘅即食麵。喺最新公佈嘅2019年度全球十大即食麵排行榜上，新加坡百勝廚（Prima Taste）嘅叻抄拉麵連續四年名列第一。

排第二嘅係馬來西亞紅廚嘅櫻花蝦辣湯麵。

至於中國內地良呈美「biángbiáng麵」排行第三，更係中國內地生產嘅即食麵歷來最高嘅排名！

大家熟悉嘅香港壽桃牌冬蔭功拉麵同埋印尼營多撈麵仁當味分別排第九同第十。第四至第八名嘅即食麵分別來自馬來西亞、新加坡同臺灣。

（圖片來源：百勝廚）

內地啱啱結束咗「五一黃金周」假期，日本亦結束咗慶祝新天皇繼位嘅「超級黃金周」長假。

一連十日放假，唔少人出外旅遊，但對於被視為神獸嘅「奈良鹿」，就唔係一件咁舒服嘅事啦！

事關大家去親奈良，都會見吓班鹿仔，然後又用「鹿仙貝」餵佢哋。但旅客太多、餵得多、食得多就滯啦！擺喺面前、口邊都無反應。有啲就索性匿埋瞓覺去也。

醫生都話要身體健康，其中一樣就係要避免暴飲暴食，鹿仔都一樣㗎！

（圖片來源：bubble_oOoO@twitter、Brise_Marine@twitter）

尋晚係農曆四月初一，為全球穆斯林更係一個神聖時刻——因為尋日亦係伊斯蘭曆九月一號，象徵一年一度的齋戒月（拉馬丹月）嘅開始。

但各地方齋戒月開始唔一定係初一。由於各地天氣不同，未必喺初一見到新月🌙，例如近日港澳地區天氣唔好，睇唔到新月，齋月就喺初二（今日）開始。

如果你有信奉伊斯蘭教嘅親戚、朋友、同事、鄰居、家傭，請尊重佢哋嘅習俗，避免喺佢哋面前飲食或日頭請人食飯，但如果你齋月喺馬來西亞、中東等地方旅行，佢哋可能會夜晚請你食開齋飯，或者可以去齋月市場掃街！想同佢哋加油打氣，可以講一聲Ramadan Mubarak，即係「齋月吉慶」啦！

另外，如果喺中東國家旅行，要注意齋月期間當地車輛開得比較快，外出時請注意交通同人身安全。

當地司機白天禁食，易疲勞，建議盡量避免坐車長途旅行，以免發生交通意外。如果確需長途旅行，應要求司機唔好開快車，同時增加中途休息次數。

（部分資料：中國駐阿聯酋大使館）

平時人來人往嘅地鐵車站，即將成為消閒娛樂好去處？呢個夢想，兩年後就會喺法國巴黎實現。

將會改建成酒吧嘅車站其實係位於巴黎第六區（左岸）、地鐵10號線塞夫爾-巴比倫站同馬比永站之間嘅幽靈車站——紅十字站（Croix-Rouge）。月台改裝完成後，將包括餐廳、市場，並擁有一張長75米嘅吧枱。

而酒吧開放時間將同地鐵首尾班車同步。根據目前營運時間表推算，應該是早上5時38分到翌日凌晨2時06分之間。

考考大家：巴黎有邊一個名勝係由火車站改建而成呢？

（文字來源：Timeout 法國；圖片來源：© Same Architectes）