日本各都道府縣都有自己嘅吉祥物，嚟宣傳自己地方嘅特色。大家最熟悉嘅相信係熊本熊啦！
咁位於日本東北嘅岩手縣又會用乜嘢做吉祥物呢？呢兩日有結果啦！原來係同開發Pokemon動畫嘅公司合作，搵咗「小拳石」做吉祥物！拳即係手啦，而岩又即係石，真係入型入格啊！
睇吓小拳石下面對腳仲用代表透明嘅灰白格仔表示，真係好專業啊！
大家聽埋首主題歌啦！《岩與手！岩手！小拳石！》https://youtu.be/pFvkhkWJR7U
（圖片來源：神奇寶貝系列 Pokémon@facebook）
新加坡國家環境局近日推出粉紅色背心，供因亂拋垃圾而被罰勞改令嘅人著上。
根據統計，舊年新加坡發出超過39,000宗亂拋垃圾罰單，比2017年增加兩成二，更係九年新高。而被判罰勞改令嘅案例，比2017年增加三成。
新加坡自1992年起引入勞改令，要求累犯嘅垃圾蟲喺公共場所執垃圾，少則三個鐘，多則12個鍾，以提高垃圾蟲對亂抛垃圾後果嘅意識，亦體驗清潔工所面對嘅困難。
自今個月起，除咗喺垃圾蟲原本黃色嘅勞改背心加上粉紅色加蛋識別外，當局亦會在有垃圾蟲進行勞改嘅地方設立企牌通知公眾，進一步加强阻嚇力。
（圖片來源：新加坡國家環境局）
近年喺澳門可能會見到圖中呢種人，通常係西方人面孔（喺台灣試過有日本人），佢哋喺街上表演或者賣小手作，例如明信片，然後話自己需要旅費，希望大家支持。
呢種人稱為乞丐背包客，原本係英文beg（乞討）同backpacker（背包客）兩個字結合起來。
而喺乞丐背包客氾濫嘅泰國，近年除咗實施入境要帶一定數量現金嚟打擊呢類旅客，最近仲頒布新法律，禁止行乞。當局會喺旅遊點、機場同政府機關用多種語言提醒國民同遊客，亦會要求寺廟合作，教導公眾正確嘅布施方法，而非畀錢畀乞丐。
相關官員表示，如果真係想幫助乞丐，可以捐款畀政府嘅職業轉介計劃。
新法例對於行乞行為，初犯罰款500泰銖（折合128澳門元），最高可處一個月監禁、罰款一萬泰銖。要求乞丐進入「生活質量發展與保護中心」或者放棄行乞。一旦進入中心，未經批准不得擅自離開，否則亦最高可處一個月監禁、罰款一萬泰銖。
支援或協助行乞行為者最高可處兩年監禁、罰款兩萬泰銖，而操縱行乞、從行乞獲利者最高可處三年監禁、罰款三萬泰銖。
根據政府數字顯示，喺曼谷自2018年10月到今年3月，發現咗237個乞丐，其中81個人外國移民，另外有4,361個已註冊嘅街頭表演者，表現場地有300個。
（圖片來源：Pearl Law）
位於秘魯山林之中嘅馬丘比丘（Machu Picchu）古城，係秘魯最著名嘅景點、「世界新七大奇蹟」之一。
秘魯政府上星期五宣布自聽日（5月15號）到28號，將會嚴格限制進入遺址中嘅三個地點，包括太陽神殿、神鷲神殿同栓日石，目的係要保護通往遺址嘅石砌路面，免受進一步破壞。
喺未來兩星期，每日只准許約6000個遊客分兩批進入上述地點，每次限三個鐘頭。新措施經過評估後，當局會喺6月1號起實施永久性措施。
馬丘比丘係印加君主帕查庫特克建立嘅，由美國探險家海勒姆·賓厄姆喺1911年再次發現，1983年被列為世界文化遺產。
（圖片來源：Shutterstock/aaabbbccc）
印尼《雅加達郵報》5月12日消息：據航空研究網站OAG公佈的2019年4月全球航空公司準點率數字，印尼國家航空公司印尼嘉魯達航空以95.5%準點率，連續第二個月位居全球第一。
嘉魯達航空營運總監表示，要在將來開臨的開齋節維持準點率有挑戰性，但會透過加強飛行操作的監察，尤其是在安全措施方面，有信心能安全、準時、舒適地渡過高峰期。
華人社會視魚翅為珍品，但龐大需求令全球鯊魚數量急速下降，更威脅海洋生態平衡。
世界各地日益意識到呢個問題，越來越多人都響應號召，停止食用魚翅。最近loyaltylobby網站5月6日報道，日本航空喺東京嘅貴賓室被揭發有供應魚翅湯，兩日後日航宣佈即日起永久停止供應魚翅湯，同時聲明未有在機上提供同類菜色。
（© Jeff Rotman/jeffrotman.com）
版主：荷蘭阿姆斯特丹以紅燈區聞名於世，但背後是多少人的眼淚？你可以好像貨物一樣買一個人嗎？
「我是無價的！」荷蘭青年發起請願活動 籲政府禁嫖娼
http://bit.do/eQXvi
（圖片來源： Ik ben onbetaalbaar）
前日日本錄得今年第一次超過攝氏30度嘅高溫。有興趣去日本嘅朋友，不妨留意一下以下同夏天有關嘅詞語啦！
例如圖中提到嘅「真夏」（ま なつ ma natsu）日，係「盛夏日」嘅意思，即係一日最高溫超過30度嘅日子。而喺日本由於緯度比澳門高，超過25度已經算係「夏日」。超過35度叫「猛暑日」（もうしょび mo sho bi）。
如果夜晚最低溫超過20度、25度同30度，分別稱為「真夏夜」、「熱帶夜」（net tai ya）同「超熱帶夜」（cho net tai ya）。
日本夏天最主要嘅活動係「祭典」（祭，matsuri），例如係全國性嘅七夕、盆節（包括德島嘅阿波舞），東北三大祭典（青森睡魔祭、秋田燈竿祭、仙台七夕祭）、京都祗園祭等。大家都要著浴衣（yukata）出街，玩「花火」（煙花，hanabi）。盆節期間亦係日本人旅遊同送禮嘅旺季。
仲有，記得品嚐流水素麵（流しそうめん，nagashi somen）、喺「土用の丑の日」食鰻魚飯啦！
（圖片來源：livedoor）
後日就係一連三日嘅佛誕假期啦！
佛教同基督宗教、伊斯蘭教，合稱「世界三大宗教」。自從佛陀涅槃後，佛教分成南北兩個分支。北支有我哋熟悉嘅漢傳同藏傳佛教。南支就稱為南傳佛教（上座部佛教），主要分佈喺南亞同東南亞。
咁東南亞各國嘅佛教同印度教建築有咩特色？呢張圖表可以畀你一個初步印象。
有三點值得留意：
最後，版主喺呢度祝大家佛誕吉祥！
（圖片來源：VectorStock）
五月啦！又係榴槤上市時。不過如果食完榴槤要揸車，隨時會惹禍上身！
最近喺江蘇省如東，有人喺路上被警方攔截，吹氣之後酒精濃度超標。但司機否認，話自己只係食咗「果王」榴槤。
後來司機抽血，證實咗無酒精，而警方後自己做實驗，發現食完榴槤之後吹氣確實會超標。而原因係榴槤高糖，加埋口水會發酵，產生酒精。
其實，除咗榴槤之外，荔枝、腐乳、香口膠、漱口水都會令呼氣測試失準。
另外，食榴槤禁忌有好多，其中一樣係「榴槤唔可以送酒」。咁係因為榴槤會抑制體內解酒嘅酵素乙醛去氫酶，造成越飲越醉嘅情況出現。而對糖尿病人嚟講，咁樣做更加危險，咁會令血壓同血糖升高，危害心腦血管，嚴重會引起中風或心肌梗塞。
濠遊天下 Macau on Journey, 