講起葡國，相信大家好少人諗到高山，更少人都會諗到會落雪。
但葡國係有山，亦都會落雪嘅！
位於葡國中部嘅埃什特雷拉山（Serra da Estrela，即係「星星山」咁解），上星期五（5日）上午九點由於有雪，部份山區道路被迫封閉。
埃什特雷拉山海拔1,993米，係葡國喺歐洲部份嘅最高點。當地有滑雪場，特產係用綿羊奶做原料、手工製作嘅芝士（Queijo Serra da Estrela）。當地牧羊犬亦係葡國最古老嘅原生狗種。
（圖片來源：維基共享資源 CC BY 2.0）
葡國四月雪
All posts by 濠遊天下 macauonjourney
泰新王加冕在即 考山路潑水節活動取消
泰國一連五日嘅國曆新年（潑水節 / 宋干節）假期將會由星期五（12日）開始。但今年喺曼谷嘅慶祝活動可能會稍為失色一啲。
因為今年5月4日至6日，將會舉行泰王拉瑪十世（哇集拉隆功）嘅加冕大典。臨近典禮準備工作中心區域嘅考山路（Khaosan Road），今年將會取消正式嘅潑水節活動。
考山路一帶商家屆時仍將照常營業，但不會提供無限量用水和彩粉。
（圖片來源：REUTERS/Soe Zeya Tun）
大馬出入境要小心
澳門同珠海之間嘅關閘——拱北邊境係世界上最繁忙嘅邊境。而位於新加坡同馬來西亞新山之間嘅新柔長堤都非常繁忙。
但係講到出入馬來西亞，大家就要小心啦！
馬來西亞《中國報》星期日（7日）報道，有一對新加坡夫婦日前接完叔仔去新山之後返新加坡，結果發現護照無出境章。連原本當日要去雲頂嘅行程擔心再入境會出問題，都要取消。有親友建議換護照，而新加坡當局畀佢哋意見係：「印章重要，掃瞄護照更重要，至少系統可以查到出境記錄」並建議事主向駐新加坡嘅馬來西亞高級專員公署（相當於大使館）報告。
而原來新山移民局官員出錯已經唔係第一次。4月3日又有新加坡人去完新山，發現出境日期竟然係第二日（4月4日）。
*****
版主：2010年第一次去大馬，喺檳城機場入境，個移民局官員居然冇幫我護照蓋章。結果喺吉隆坡離境嘅時候，因為咁就畀人「的」入房，出示咗入境機票先走得！
（圖片來源：維基共享資源CC-SA-3.0）
版主感言
細心嘅讀者有冇發現，版主之前幾日好似無出帖呢？
無錯，一方面趁清明休息一下，同埋版主之前考嘅導遊牌，終於有用武之地啦！呢幾日開始有團要招呼，生活節奏亦隨之而要調整。依家盡量會集中利用夜晚唔駛開工嘅時間，繼續同大家分享各項旅遊資訊同埋優惠，以及版主嘅旅行經驗同埋經歷。
為咗實現版主遊遍天下嘅夢想，版主會繼續努力！希望大家都可以繼續與我同行！
彰化車庫休整中
位於臺灣彰化市、有97年歷史嘅扇形車庫，係全臺灣唯一嘅同類車庫。
由於枕木及木棧道風化損壞嚴重，需進行枕木抽換工程，車庫自尋日（4月8日）到5月7日將暫停對外開放參觀。
大家去唔到車庫唔緊要，唔好唔記得彰化大佛、孔廟同埋電影《那些年，我們一起追過的女孩》入面嘅「精誠高中」啊！
（攝於2013年3月）
再見福譯諭吉！日本換新鈔
下個月日本就要迎接新天皇同埋「令和」新年號。除咗錢紙要印上新年號，就連設計都會變身！
日本政府今日宣布，一千、五千同一萬日元新鈔的圖樣，大家熟悉嘅福澤諭吉將退出一萬日元封面，由創立第一國立銀行，東京證券交易所嘅澀澤榮一取代。
五千日元繼續由女性擔綱，由創立津田塾大學嘅津田梅子取代作家樋口一葉。而一千日元就由醫學家、細菌學家北里柴三郎取代另一位醫學家野口英世。
新鈔發行嘅主要目的在於防偽。新鈔2024年上半年起陸續發行。另外，同樣具有新防偽技術嘅新版500日圓預計會喺2021年上半年起陸續發行。
至於2000日元設計就唔會改變。
泰北霧霾
近日泰國北部地區，包括遊客常到嘅清邁同埋清萊，成為全球空氣質素最差嘅地區之一。據當地媒體報道，今次被形容係「十年來最差嘅霧霾」，情況恐怕將會持續到五月。
持續已經兩個月嘅霧霾天氣係由於天氣炎熱、無降雨以及微風所造成，同時當地有六十多處地區出現山火。泰國總理巴育星期二曾到泰北視察，並同當地官員會面商討對策。
霧霾嚴重打擊泰北嘅旅遊業。自二月至今，北部夜豐頌機場已經有四十班航機取消。即使即將迎來潑水節嘅旅遊旺季，當地酒店入住率亦由往年嘅85%下降至60%。
（圖片：Nattapol Lovakij@曼谷郵報）
塑膠成災 奈良鹿中招
之前大家都講緊塑膠對於海洋生物嘅傷害，其實塑膠垃圾對陸上動物都好危險！
日本《朝日新聞》尋日報道，喺奈良公園出沒、深受遊客喜愛嘅奈良鹿，都成為塑膠嘅受害者。
喺上個月23號有路人通報，表示「東大寺附近有鹿無法起身」。呢隻大約17歲、重30公斤、長79公分嘅雌鹿隨後被送去保護，但喺第二日上晝就死咗啦。「奈良之鹿愛護會」27號對鹿屍進行解剖，喺胃入面發現重3.2公斤嘅異物，據研判係膠袋纏繞所形成嘅聚積物。
愛護會獸醫丸子理惠話：「虛弱嘅鹿胃入面有垃圾，雖然會有咁嘅情況發生，但很少會出現咁多垃圾。呢隻鹿可能係因年紀大而衰老，不過佢體型好瘦，毛色亦唔好。」佢估計應該係胃內面塞住膠袋，令隻鹿無法攝取足夠養分。
（攝於2017年1月，非受害動物）
麻疹疫情：最新病例曾赴泰旅遊
澳門衛生局消息：
衛生局今日（4月3日）收到1例麻疹輸入性病例報告，今年至今麻疹病例累積至28例。今年至今，澳門已錄得11宗輸入和17宗輸入相關病例，其中26人已康復。衛生局呼籲所有醫務人員、醫療機構、居民及未接種麻疹疫苗的嬰兒家長注意防範。
據調查，患者為一名32歲男性，本澳居民。患者於4月1日出現發熱、咽痛、肌肉關節痛等症狀，4月2日出現面部、頸部及手腳皮疹，同日到仁伯爵綜合醫院急診就診，4月3日經衛生局公共衛生化驗所檢測，其呼吸道樣本麻疹PCR檢測呈陽性反應。目前患者仍有發熱，病情一般。患者於3月14日至19日曾到泰國曼谷及芭提雅旅遊。患者出生於澳門，曾接種麻疹疫苗。根據旅遊史及發病時間，列為麻疹輸入病例。患者家人、同行友人及同事暫沒有出現類似病徵。衛生局現正追蹤患者發病期間曾接觸人士的健康狀況。
土耳其航空：今年不來澳門
澳門機場專營公司市場部總監方曉健今日表示，土耳其航空今年開通伊斯坦堡——澳門航線的計劃將會落空。
方曉健在英國商會早餐會上回答提問時指出，土航無法在理想時段增加來往香港和廣州的航線，故有開通澳門航班的需求。他曾經兩次赴土航廣州辦事處進行商討，土航亦已在澳門進行宣傳。但由於土耳其里拉去年貶值達百分之五十，以及土航內部政策因素，今年內不會開通相關航線。
濠遊天下 Macau on Journey, 