從里斯本到澳門，葡撻經過三分一世紀嘅努力，已經喺亞洲地區落地生根。喺包括中國內地、台灣、香港等大中華地區，國際快餐連鎖肯德基（KFC）亦有銷售葡撻。

不過上星期三，台灣肯德基突然宣佈，要同葡撻（當地稱為「蛋撻」）「劃清界線」，甚至聲言「從此之後不再只是被蛋撻耽誤！」，引起網民嘩然，甚至一度出現搶購葡撻嘅情況。更有媒體喺外賣平台發現肯德基新增咗「蛋撻點心專賣店」選項。究竟葫蘆裡面賣緊乜嘢藥呢？

肯德基尋日終於公佈答案，原來係推出全新品牌「K-Dessert頂級甜選」！

而新品牌第一隻推出嘅產品係「莓果奶酥撻」，據講係選用肯德基手製163層酥皮、雲呢拿味吉士醬、精選美國純天然鮮凍小紅莓，以及用比利時珍珠糖製成嘅奶酥製作而成。「莓果奶酥撻」將會由今日起喺全台各肯德基分店發售。

至於葡撻仍然會喺台灣肯德基繼續發售，各位葡撻迷都可以放心啦。