【濠遊Staycation】精釀啤酒點樣整出嚟？

復活節假期，唔知大家有咩活動節目呢？今期濠記就為大家推介一個參觀啤酒廠嘅活動畀大家。

大家平時可能三五知己，閒時都會聚埋一齊，學Sam Hui話齋「飲返杯冰凍啤酒」，高歌一曲嘅。但你又知唔知，原來澳門都有自家生產嘅精釀啤酒（craft beer）呢？

大家平時喺超級市場見到嘅，多數係工業化生產嘅啤酒。而精釀啤酒同工業啤酒有兩個主要分別：一個係精釀啤酒喺生產工藝上，唔會採用巴氏殺菌法，保質期會比工業啤酒短：另外同工業啤酒大眾化路線唔同，精釀啤酒講求嘅係個性化，可以按照客戶要求生產小眾口味，例如芫荽味、咖啡味等。至於兩者飲落去會有咩分別？當然要你自己去到試過至知啦！

至於啤酒廠嘅故事就要講到三個大學同學啦：佢哋都好鍾意飲啤酒，但當時澳門又無精釀啤酒，就一人投資一萬蚊，自己整啤酒賣。開頭佢哋周圍收集木版，自己整咗木箱，就拎啤酒去康公夜市賣，希望向澳門人介紹精釀啤酒啦。當時佢哋亦都將品牌命名為「2048」，就係希望同澳門社會有所連結。可惜嘅係，原來嘅木箱喺2017年天鴿風災中損毀咗。而喺酒廠裡面展示嘅啤酒車係第二代嚟嘅。

後嚟有大學老師知道佢哋有做啤酒，就鼓勵佢哋去參加各種比賽，並開咗佢哋第一間快閃店同埋餐吧。

而點解佢哋由原來經香港代工，改為喺澳門自設廠房生產呢？「係疫情嘅關係。」