尋日同大家講過喺日本有人用秋天落葉砌成圖案啦。而楓樹就係觀賞紅葉最常見嘅樹種。除咗觀賞之外，喺美國東北部同加拿大東部，楓樹仲有一個重要用途，就係收集樹汁製成楓糖漿（maple syrup），用嚟代替蜜糖或者普通糖漿。

不過喺全球楓糖漿最大產區、加拿大魁北克省，當地楓糖漿生產商聯合會最近就宣佈，由於今年供應無法滿足需求，需要釋出5000萬磅儲備楓糖漿，佔總儲量嘅一半。

魁北克佔全球楓糖漿產量七成，而美國係楓糖漿最大嘅市場。今年楓糖漿需求比舊年增加咗21%，而且採集楓糖漿係季節性活動，今年短暫而溫暖嘅春天令到楓糖漿產量大減。

組織表示，未來會喺多700萬棵楓樹上採集糖漿，以填補儲備並確保供應量可以滿足來年嘅需求。

（NPR）