仲有五個禮拜就係普天同慶嘅聖誕節啦！

不過今年受到極端天氣、全球供應鏈危機等因素影響，加上新型肺炎疫情後需求增加，作為聖誕節主要嘅裝飾品聖誕樹，無論係天然樹定係人造樹，價格都有所上升。

天然聖誕樹方面，美加西部今年出現旱災，導致聖誕樹產量大減。而作為全球天然聖誕樹最大出口國嘅加拿大，西部卑詩省剛剛又受到暴雨侵襲，又影響咗國內聖誕樹供應。另外，聖誕樹種植成本亦都增加咗五成。天然聖誕樹價格預計會上漲兩成至三成。

即使要退而求其次，想購買人造聖誕樹，受供應鏈問題，包括船期延誤、航運成本上升等因素衝擊，價格亦將會上升兩成至兩成半。

而喺美國，作為感恩節以及聖誕節傳統食物嘅火雞，今年嘅價格比去年上升咗兩成，更比過去三年平均價格上升三成半。而根據美國農業事務聯合會（American Farm Bureau Federation）最新調查，今年十人份嘅感恩節大餐費用平均為53.31美元（折合約428澳門元）比去年嘅十年低位上升咗一成四。

（霍士／《財富》／《國家郵報》／CBS）