喺大家唔得閒煮飯，或者大嘆「為何深夜總是餓」嘅時候，即食麵係好多人醫肚嘅好朋友。

美國即食麵達人Hans Lienesch自2002年起已經開始品評全球各地生產嘅即食麵，至今已經評比過超過4000種即食麵。而佢喺近日六亦都公佈咗本年度全球即食麵排行榜。結果，新加坡同馬來西亞嘅品牌各佔三名，臺灣兩名，韓國同香港各佔一名。

其中新加坡包辦咗頭兩位，分別係百勝廚（Prima Taste）「叻沙全麥拉麵」以及Chillies Brand「蝦米香乾撈麵」。百勝廚另一個品牌「檳城白咖哩麵」排名第八。馬來西亞代表分別有MyKuali「檳城白咖哩湯麵」、Red Chef「櫻花蝦辣湯麵」同埋「青酸辣湯麵」，分別排名第三、第五同第八。

至於臺灣都有兩隻品牌上榜，有阿舍食堂「老饕半筋半肉牛肉麵」以及老媽拌麵「擔擔麵」，分別排名第四同第九。韓國同香港各有一個代表，分別係排第六嘅三養「火辣白醬奶油雞肉辣炒年糕麵」以及第十名壽桃牌「冬蔭功拉麵」。

對於百勝廚叻沙全麥拉麵，Lienesch咁樣評價：「呢款麵多年來都係我嘅至愛。粗身麵條煙韌，與湯底非常匹配。湯底係濃郁香辣嘅叻沙湯底，各種香草和調味巧妙地共冶一湯。椰子粉更將呢一切變得既正宗又美味，令人感到欣喜、嘆為觀止，令我每次品嚐都可以徹底享受。」

為公平地評價各款即食麵，Hans Lienesch嘅評審方式以按生產商嘅烹調說明，以及即食麵包裝內材料烹煮即食麵，不添加外來成份。