疫情發生已經超過一年半啦。仲記得上次坐飛機係幾時呢？上次食飛機餐係幾時呢？而你食過最好同最差嘅又係點嘅呢？

大家都知道為咗控制成本，廉價航空嘅其中一個特色就係no-frills，即係基本服務以外，細至一枝水、一個麵包都要額外收錢。咁但係有啲廉航出名係一分錢，都未必有一分貨。以下係最新一個例子。

愛爾蘭一名暢銷犯罪小說作家Liz Nugent上星期五喺社交網站分享咗佢朋友、女賽車手Aimee Woods乘坐瑞安航空（Ryanair）時影嘅相，話喺機上用5.5歐元（折合約52澳門元）買咗一份煙肉三文治，結果原來塊麵包無搽牛油，上面嘅煙肉只有薄薄兩片，每片都得麵包長度嘅大約一半。事主形容呢份三文治係 the world’s saddest bacon sandwich（世上最可悲嘅三文治）。但佢冇退貨要求回水，因為當時實在「太餓」。

相片引起網上熱烈討論。有人話成件事好似一件思考練習，究竟要將煙肉三文治嘅概念扯到幾薄就再唔算係一件「煙肉三文治」。又有人話航空公司係咪連牛油錢都要單獨收費。亦有人話：除咗冇牛油、醬料同似樣配菜外，諗起有人要將一薄片肉再撕開勒緊褲頭，同樣令人擔心。

不過有人批評事主唔理解，過去一年半為航空業係十分艱困嘅時期。Aimee Woods回應話：「我還是享受了一段美好嘅航程，乘務員都好優秀。我只係覺得件三文治幾風趣同埋有啲貴。我始終都食咗件三文治。老實講，未必會有人因為三文治嘅質量而唔去乘坐某家航空公司嘅航班。」航空公司對此尚未作出回應。

（英國《都市日報》）