松露、魚子醬、鵝肝，被譽為「世界三大美食」，松露更有「餐桌上鑽石」嘅稱號。其中白松露只分佈喺歐洲中南部山區，舊年七月平均價格更達到每公斤1555美元（折合約12462澳門元）！

不過呢種罕見美食有機會可以喺台灣食到啦！臺灣農業委員會林業試驗所日前宣佈，發現第二種原生松露品種——小西氏石櫟松露，更成功發展出人工培植技術。

據介紹，林試所所助理研究員林介龍2018年在海拔約1千多公尺的高雄六龜研究中心附近嘅多納森林，喺台灣原生樹種、小西氏石櫟樹根嘅土壤入面意外發現白松露，挖掘後帶返，由研究員傅春旭分析，發現呢朵松露係全新品種，因此以首次發現的宿主來命名。團隊舊年喺台東利嘉林道長尾尖葉櫧林地，發現小西氏石櫟第二個生長地，並挖出17粒大小不一嘅松露。

試驗所預計，小西氏石櫟松露以及臺灣另一種原生種白松露深脈松露，將會喺八年後產出子實體、十年後可以大量生產。

傅春旭研究員介紹，相對歐洲松露，小西氏石櫟松露偏清淡花香，後段有朱古力，甚至人蔘嘅味道。由於發現數量少，佢亦坦承目前只有乾製後保存做研究，「仲未有人真正食過小西氏石櫟白松露」。所長曾彥學又表示，台灣原生種松露有21種，其中台大發現咗其中兩種、林試所發現咗五種，仲有十幾種有待發現、栽植。

（中央社／自由時報／央廣）