相信好多澳門人同埋嚟過澳門玩嘅朋友都食過馬介休（bacalhau）啦！佢其實就係用鹽醃過嘅鱈魚，係葡國傳統嘅食品，尤其是喺平安夜，更係葡國人飯枱上嘅主角。

不過就喺尋日平安夜，英國同歐盟終於就脫歐達成協議，而協議核心議題之一係捕魚權問題。協議將會影響明年馬介休嘅供應。

英國脫歐同葡國捕魚權嘅關係，並唔係因為葡國漁民會去英國水域捕魚。葡國漁民捕撈鱈魚嘅主要漁場喺另一個非歐盟成員國挪威。而由於之前英國同歐盟未達成協議，挪威亦唔會同包括葡國在內嘅其他歐洲國家談判捕魚權問題。

葡國捕魚業協會主席Luís Vicente指以往同挪威嘅談判一般十一月就已經達成，目前已經太遲。 佢解釋：「英國同歐盟達成協議對葡國漁業有好處，因為咁歐盟同挪威先有可能談判，令葡國漁船可以喺復活節前去挪威水域捕魚，因為之後就嗰度就唔會有鱈魚。」

業界表示，今年在加拿大水域的鱈魚捕撈量比去年下跌八成，挪威漁場變得尤其重要。業界要求政府在談判中盡力，以確保國民明年餐枱上仍然有馬介休。 （TSF電台）