大家都知道印度係咖哩嘅祖家。不過有日本連鎖餐廳就返到印度開咖哩餐廳。

呢間全球擁有1400家分店嘅咖哩店，想喺呢個中產階級興起、對國際美食日漸有興趣嘅國家站穩腳跟，亦都需要作出一啲改變，例如餐牌唔會有印度教徒唔食嘅牛肉同埋穆斯林唔食嘅豬肉，反增加咗印度菜常見嘅鄉村芝士同茄子。

店方強調，餐廳進入印度唔係要同祖家嘅咖哩競爭，因為日式咖哩同印度咖哩係兩樣好唔同嘅嘢。餐廳助理行政總監話市場反應唔錯，而且有回頭客。

餐廳開業時適逢新型肺炎疫情，但似乎未受到影響。客人喜歡將日式口味同地道印度咖哩比較。有當地食客話，日本咖哩味道會令人上癮，會令人越食越想食喎。

講返咖哩點樣傳入日本，原來係來自英國海軍食用咖哩嘅傳統。當時日本海軍以當時世界上最強大嘅英國海軍為模仿對象，就引入咖哩牛肉配以白飯以改善海兵營養。加入麵粉嘅湯汁比較容易附在白飯上，避免在海上風高浪急時會瀉到周圍都係。

日本海軍，到依家嘅海上自衛隊，每星期五仍然保留咗食咖哩嘅習慣，原因係可以令長期喺海上生活，欠缺日期觀念嘅水手，可以記得邊一日係星期幾。而東京灣外港橫須賀係日本咖哩嘅誕生地。

（法新社）