仲有唔夠一日我哋就要告別2019年，迎接新一年嘅到來。今晚準備出去倒數之前，不妨參考一下版主為大家精心搜集嘅資料啦！

首先喺天氣方面，氣象局預料今日早上，一股東北季風將會抵達本澳，屆時本澳風力增強，氣溫略降，天氣清涼。元旦日最低氣溫約15度左右，日間有陽光。氣象局呼籲外出倒數嘅市民留意氣溫變化，注意保暖。

至於倒數地點方面，喺西灣湖廣場將會舉辦「2019澳門除夕倒數演唱會」。屆時澳門著名歌手小肥、香港人氣男團 Mirror等嘉賓同大家一齊辭舊迎新。活動將會同時喺議事亭前地、南灣湖水上活動中心，仲有澳廣視的「澳門綜藝」頻道、澳廣視網站及澳廣視應用程式直播。另外喺氹仔龍環葡韻嘅倒數晚會，除咗香港歌手王馨平等獻唱外，仲有多元文化主題攤位以及文藝表演。

其他舉行倒數活動嘅地點仲包括新葡京、澳門威尼斯人及澳門巴黎人、澳門漁人碼頭、澳門百老匯、澳門十六浦、美獅美高梅、澳門銀河「麥卡倫威士忌吧」、君悅酒店大堂、澳門星際酒店「品味吧」、澳門銀河「紅伶」等。

另一個大家關心嘅相信係散場嘅交通啦。今晚輕軌將會延至凌晨一點收車。46條日間巴士路線的尾班車分別喺凌晨一點同兩點開出，兩條夜間巴士路線（N3及N5）亦於同日凌晨零時至三點加密班次﹔同時，N3調整以大巴行駛。

今晚仲會臨時新增32T、51X及88X快速路線﹔其中，32T路線往返西灣湖街及亞馬喇前地，51X及88X路線往返金光大道及關閘以疏導市民同遊客。仲有，今晚八點到翌日凌晨三點，往返路氹連貫公路嘅多條巴士路線，將臨時不停靠「連貫公路 / 巴黎人」站以及「連貫公路 / 金沙城中心」站。到時要到附近地點嘅朋友就要留意返啦！

最後當然要祝大家今晚玩得盡興，玩得平安！2020新年進步，遨遊四方！