十二月係澳洲嘅夏天。不過近年澳洲夏季氣溫受氣候危機影響屢創新高。

今日澳洲氣象局公佈，星期二（17日）全國平均氣溫係40.9攝氏度，打破2013年嘅紀錄，創出史上最高。廣大內陸地區普遍高達45度。

主要城市方面，墨爾本往年十二月平均溫度係25度。但今日氣溫高達40度。塔斯曼尼亞首府霍巴特星期五氣溫將達到33度。

而喺西澳洲首府珀斯，有人上星期五嘗試利用當地高溫，喺一架舊車入面煮熟一件重1.5公斤嘅豬肉。結果十個鐘頭後，佢成功咗！

原來當地當日氣溫高達39度，而車內溫度更高達81度。而件豬肉係煮到完全熟透！但佢亦好心提醒大家，千祈唔好留低小朋友或寵物喺車入面。

提提大家，豬肉同牛肉唔同，需要完全煮熟先可以進食。香港食物安全中心建議，中心溫度需達最少攝氏75度。