五月啦！又係榴槤上市時。不過如果食完榴槤要揸車，隨時會惹禍上身！

最近喺江蘇省如東，有人喺路上被警方攔截，吹氣之後酒精濃度超標。但司機否認，話自己只係食咗「果王」榴槤。

後來司機抽血，證實咗無酒精，而警方後自己做實驗，發現食完榴槤之後吹氣確實會超標。而原因係榴槤高糖，加埋口水會發酵，產生酒精。

其實，除咗榴槤之外，荔枝、腐乳、香口膠、漱口水都會令呼氣測試失準。

另外，食榴槤禁忌有好多，其中一樣係「榴槤唔可以送酒」。咁係因為榴槤會抑制體內解酒嘅酵素乙醛去氫酶，造成越飲越醉嘅情況出現。而對糖尿病人嚟講，咁樣做更加危險，咁會令血壓同血糖升高，危害心腦血管，嚴重會引起中風或心肌梗塞。