平時人來人往嘅地鐵車站，即將成為消閒娛樂好去處？呢個夢想，兩年後就會喺法國巴黎實現。

將會改建成酒吧嘅車站其實係位於巴黎第六區（左岸）、地鐵10號線塞夫爾-巴比倫站同馬比永站之間嘅幽靈車站——紅十字站（Croix-Rouge）。月台改裝完成後，將包括餐廳、市場，並擁有一張長75米嘅吧枱。

而酒吧開放時間將同地鐵首尾班車同步。根據目前營運時間表推算，應該是早上5時38分到翌日凌晨2時06分之間。

考考大家：巴黎有邊一個名勝係由火車站改建而成呢？

（文字來源：Timeout 法國；圖片來源：© Same Architectes）