暑假除咗各種戶外活動之外，本地都有好多文藝活動，可以俾大家用唔同嘅角度去認識我哋生活嘅城市。

今次濠記一連介紹兩個攝影展。首先係由澳門天主教文化協會主辦嘅「發現日常生活的美」——梁舜堯攝影展。

梁舜堯（António Leong）係近年本地頗受歡迎嘅攝影家，更喺2016年起多次獲得「國家地理全球攝影大獎」獎項。今次嘅展覽分別展出咗關於西望洋聖堂、聖若瑟修院以及聖老楞佐堂嘅攝影作品。

展覽以不同嘅角度去展現景點嘅美感，並且配合咗聖經嘅金句，欣賞藝術作品之餘，又可以陶冶心靈。尤其是係以聖堂作為背景嘅照片，上演著一幕幕大自然精彩、但人們往往習以為常嘅表演，更會令人對背後嘅造化者感到驚嘆！

不過今次嘅展覽，係一個月只展出一個景點嘅照片。亦即係話西望洋聖堂嘅照片展期仲有唔夠一個禮拜！唔想錯過就要把握機會啦！

「發現日常生活的美」——梁舜堯攝影展

展覽日期至9月30日
展覽地點：澳門天主教文化協會（美麗街2B地下）
時間：上午十時至下午五時
查詢：2856 2247

• 

• 

• 

• 

---

而另一個攝影展係澳門攝影學會主辦嘅「看得見的記憶」懷舊照片展。展覽分成四個主題，展出左二百幾張由上世紀40年代到90年代拍攝嘅作品。

除咗一般嘅靜態展示之外，仲有將新舊景觀放埋一齊比較，除咗可以感受到物換星移、澳門社會過去幾十年嘅發展之外。展覽當中亦有展出懷舊相機，亦都可以讓參觀者了解到攝影技術的變化。透過昔日各行各業嘅照片，可以讓上咗年紀嘅老友記懷緬過去，又可以令小朋友、年輕人認識上一代人嘅生活方式，相信可以促進兩代之間嘅溝通與交流。

「看得見的記憶」懷舊照片展

展覽日期至10月10日
展覽地點：市政署畫廊（新馬路136號地下）
時間：上午九時至下午九時

• 

• 

• 

• 

• 

• 

---