要保障飛行安全，起飛前嘅檢查必須要做到萬無一失。

好似澳洲維珍航空，最近就喺社交網站發表幾張相，原來有隻貓頭鷹喺飛機引擎嘅螺旋葉之間瞓覺，好彩畀工程師及時發現，經檢查後放返到大自然。飛機同貓頭鷹嘅呢一段奇遇總算平安結束。

事實上，萬一有雀鳥被飛機引擎吸入（鳥擊），除咗隻雀必死無疑之外，雀鳥吸入亦會傷害飛機引擎螺旋葉、卡住引擎，導致引擎停止運作、著火，最終令飛機失去動力墜毀。所以各地機場都會用各種方法趕走雀鳥，例如使用煤氣炮、恐怖眼、錄音、 驅鳥彈，甚至係獵殺、豢養猛禽等。

近期發生鳥擊嘅例子，有舊年11月3號，澳門航空一架前往首爾嘅客機喺澳門機場起飛過程中引擎吸入雀鳥，需要緊急煞停折返。最終乘客需要轉機，幸好無人受傷。

（圖片：澳洲維珍航空）

• 

• 

•