標籤彙整： 駱駝

節日, 動物, 文化遺產, 沙特阿拉伯, 住宿

全球首家「駱駝酒店」開幕

發表迴響

大家出外旅遊，通常會住酒店。如果有寵物，可能會帶住「主人 」出埋去一齊玩，或者帶佢哋去寵物酒店代為照顧。原來生活喺中東嘅駱駝都可以住專為佢哋而設嘅酒店！

喺沙特阿拉伯首都利雅得，相信係全球第一間嘅「駱駝酒店」已經開幕啦！呢間酒店係專門為參加第六屆「阿卜杜阿齊茲國王駱駝節」嘅駱駝提供休息、美容等服務嘅。當地駱駝俱樂部星期日發佈咗「駱駝酒店」嘅片段。

俱樂部發言人介紹，酒店有120個房間，超過50名員工為駱駝提供各種所需服務，包括「客房送餐」、房務、照顧、保護，以至美容服務。酒店嘅五星級服務會為「客人」提供餐飲、溫熱奶汁，並為牠們提供清潔溫暖嘅房舍。房價方面，酒店每晚收費400里亞爾（折合約857澳門元）。

有駱駝主人表示：「酒店嘅概念真係好，為駱駝、駱駝主同俱樂部職員提出一個舒適嘅環境。駱駝入住前都需要接受檢查。」

為期四十日嘅「阿卜杜阿齊茲國王駱駝節」，舊年十二月一日起喺利雅得舉行，每日吸引超過十萬名、來自海灣國家、美國、澳洲同俄羅斯嘅駱駝主人同愛好者參加。節日嘅目的係喺沙特阿拉伯走進現代化嘅同時，保留駱駝喺當地貝督因文化傳統嘅角色。

喺沙特阿拉伯，駱駝養殖業係一項產值數以百萬計嘅產業，而喺中東其他地區都有類似嘅活動舉行。

（阿聯酋《國家報》）