去加拿大或者北歐旅行，經常都會遇到警告牌，提醒司機注意橫過路面嘅野生動物。而駝鹿就係其中一種。

不過喺加拿大艾伯塔省嘅賈斯珀（Jasper），最近就有新嘅警告牌：「Do not let moose lick your car」，意思係：咪畀駝鹿舐你架車！

當地國家公園發言人就話，啲鹿舐汽車就係要攝取黏喺車身上嘅鹽份。因為喺北方地區，為咗防止路面積雪影響道路安全，一般會喺路上灑鹽。

不過任由鹿舐汽車對人對鹿都好危險。因為咁樣佢哋會習慣咗汽車嘅存在，容易造成鹿同車相撞。

發言人指近年由於「打卡」嘅熱潮，人類更主動去接觸野生動物，冇同動物保持應有嘅距離。佢亦留意到近年駝鹿嘅天敵——狼嘅數量少咗，駝鹿數量亦都因此增加咗：「亦即係話我哋要尊重佢哋，給予佢哋空間。」

發言人提示，避免駝鹿靠近汽車嘅最好方法就係見到佢就行開。園方又強調，喺公園內開車要留喺車上，避免同野生動物有互動。

不過如果真係有動物舐緊你架車，發言人都話無乜選擇可言：「我哋明白有時需要耐性。最安全嘅做法就係留喺車入面。」

另外喺日本都有野鹿舐鐵路路軌嘅情況，原理同駝鹿舐車一樣，目的係要攝取鐵軌嘅鐵質。當地交通部門就嘗試利用狗吠聲嚟驅散鹿群。