位於俄羅斯首都莫斯科嘅克里姆林宮，直到彼得大帝遷都以自己為名嘅新都之前，數百年來一直是歷任莫斯科大公同沙皇嘅居所，以及處理朝政嘅地方。至今克宮仍然收藏住沙皇使用過嘅冠冕、禮服，以及沙皇收藏嘅鑽石等稀世珍寶。

舊年受疫情影響，原訂來港澳地區展覽嘅克宮沙俄珍寶展被迫延期。如今終於好有消息啦！由香港康樂及文化事務署及莫斯科克里姆林宮博物館聯合主辦、香港文化博物館及莫斯科克里姆林宮博物館聯合籌劃、香港賽馬會慈善信託基金獨家贊助嘅「聖耀皇權 ─ 俄羅斯皇家珍品展」將於本（5）月29至8月29日，喺香港沙田文化博物館舉行。

香港展覽已經有期，希望到時可以如期恢復通關，能親臨欣賞170套展品。即使一時未有辦法去香港，亦希望澳門藝術博物館早日公佈相關展覽安排，等一年幾無辦法出國旅行嘅澳門市民都可以過吓癮止吓渴！

小知識：克里姆林
克里姆林是俄語Кремль嘅音譯，意思係城堡。

早期俄國城邦林立，並無統一國家。俄羅斯大部份地區地勢平坦，各城領主一般會選擇河口或者山丘興建城堡防禦。城堡亦係領主居住嘅地方，並設有教堂同工場。城堡最初用最常見嘅木材搭建，後來先至有石砌城堡。

目前，莫斯科、諾夫哥羅德、蘇茲達爾、喀山嘅克里姆林都係世界遺產。另外一啲主教府邸或修道院亦有同類建築。

大英博物館世界聞名，雖然免費開放，但係去倫敦來回都要幾千蚊機票啦。不過依家想睇精選藏品，唔駛飛去倫敦咁遠水路啦！

大英博物館同香港文化博物館聯合籌劃呢一個名為「百物看世界」展覽，精選咗大英博物館100件館藏，分為「起源」、「最早的城市」、「權力與哲學」及「儀式與信仰」多個主題，講述人類200萬年來嘅故事。展品來自世界各地，從大家非常熟悉嘅日本浮世繪《神奈川沖浪裏》，到古猿人石器、中國古樂器、埃及古棺槨、阿拉伯錢幣都有。

版主最感興趣嘅唔係一件，而係當中一系列嘅展品。從烏爾軍旗到描述阿富汗戰爭嘅地氈，以至巴布亞新幾內亞當代嘅戰爭用盾，以及莫桑比克藝術家創作、以槍械零件製成嘅作品《母親》，令人不禁想到暴力嘅貼身同荒誕。另外，博物館亦冇避開殖民主義嘅歷史，展品中亦都有非洲人眼中西方人形象嘅作品。可惜時間有限，睇唔到當中一件最珍貴嘅展品「馬尼拉」錢幣（81號），睇到你會對呢個問題會有更深刻嘅睇法。

星期日非常多人，建議早啲到！參觀完可以埋車公廟參拜，再去龍華酒店食燒乳鴿同雞粥！

「百物看世界——大英博物館藏品展」展覽
展覽日期：至9月9日
展覽地點：香港文化博物館一樓 專題展覽館一、二、三、四及五（沙田文林路一號）
開放時間：
星期一、三至五 上午 10 時至下午 6 時
星期六、日及公眾假期 上午 10 時至晚上 7 時
星期二（公眾假期除外） 休館
入場費：成人10 元，20人或以上團體票 7 元，全日制學生、殘疾人士及一名同行照料者、60歲或以上高齡人士 5 元
前往方法：
港珠澳大橋香港口岸乘A41巴士到沙田港鐵站，B1出口轉乘56K專線小巴