有「水都」之稱嘅義大利威尼斯，近來深受過度旅遊困擾。

繼早前推出不過夜遊客入城稅後，當地市議會16日通過新法規，適用於整個歷史城區，以及各公共交通設施。

法規規定，禁止喺運河游泳、赤膊或只穿泳裝、晚上八時至早上八時喺室外飲酒、未經批准喺夜晚舉辦室外派對。另外亦禁止公共地方野餐、喺橋上扣上鎖、喺橋上或商店櫥窗上坐，或者喺長櫈上躺臥。當局會特別注意教堂、考古遺址以及其他歷史地標周圍嘅地方。

對於行為不檢者警方有權將滋事者逐出威尼斯。而以任何形式整污糟公共地方最高可罰款500歐元（折合4,513澳門元）。妓女亦不可喺街上或運河畔拉客，否則亦可被罰款500歐元。

威尼斯市長表示，呢個法案「為每一個人都係一個開始」：「遊客喺威尼斯嘅行為應該尊重他人……我哋對不良行為零容忍」。但亦有聲音批評法例未有處理好似餐廳酒吧漫天開價等剝削遊客嘅行為。

（攝於2017年1月）