今日係聖誕節之前倒數第四個星期日，即係西方基督教教會曆法裡面，將臨期（Advent）第一個星期日。亦即係大家要開始準備過聖誕啦！

呢個時候世界上好多地方都會開始亮起聖誕燈飾，澳門作為中西文化交匯嘅地方當然都唔會例外。不過大家對今年嘅聖誕燈飾似乎都幾多意見喎！

喺英國倫敦，最經典嘅聖誕燈飾就要數到呢款天使造型啦！

不過，素以搞怪出名嘅蘇豪區（Soho），就搵咗當區學校嘅小學生，喺建築師、英國皇家建築師協會建築大使Antonio Capelao指點下設計今年總共廿一處聖誕燈飾，並且已經喺11月8號舉行亮燈儀式。

呢啲燈飾都係由小朋友手繪而成，由傳統嘅雪人、聖誕樹，到充滿異國風情嘅菠蘿都有。不過喺小朋友天真嘅筆觸之下，有啲圖案會令你意想不到，笑完又會有一種暖心嘅感覺，對呢班小朋友嘅天馬行空同埋大人願意畀小朋友機會展示自己對聖誕嘅體驗感到敬佩。

呢批聖誕燈飾將會展出至明年1月3日。至於今年倫敦市內其他區域嘅聖誕燈飾可以睇吓呢個網址：Christmas lights in London。

其實，早在十幾年前，蘇格蘭有條村落就已經邀請小朋友設計聖誕燈飾嘅做法，不過每年只有一件作品入選，最終被製成燈飾點亮。不過亞軍都唔駛失望，佢嘅圖案都會用嚟製成聖誕卡嘅。

（This is Soho / Wales Online）