中東國家阿聯酋星期二宣佈，明年實行四日半工作日，星期五下晝至星期日休息。咁各國民眾會喺星期幾休息呢？

首先呢度有兩個概念，一個係例假，另外一個係節日。例假就係每隔一段時間休息嘅日子，目前國際上通行每周休息至少一日，但係每周休星期幾、休幾多日就各國不同。

中國傳統上係農業社會，大部份人係以農時安排生活，「日出而作，日入而息」，春天至秋天都要專心耕作，即使係冬天農閒都要進行工具、房屋等修繕，以及要服皇帝派下嘅徭役，例如軍事操練、修建皇陵等工作。定期休息日基本係官員、士兵、太學生嘅專利，漢代係五日一休，稱為「休沐」，唐代壓縮為十日一休，即「旬假」，到元代更一度被撤銷，至明太祖朱元璋死後才恢復月假三日。而七日休息一日係要到清末先至出現。

每七日休息一日係源於一神宗教嘅傳統：猶太人以神花六日創造天地，第七日休息（《創世紀》第2章第1-3節）嘅典故，以星期五日落至星期六日落為安息日。當日不得勞作，即使要外出走路，距離亦有限定。同時，安息日係祈禱、休息，同家人共聚嘅時刻。

而喺基督教文化入面，就以星期日為休息日，因為耶穌基督係喺星期五受難，喺第三日、「一周嘅第一天」（《路加福音》第24章第1節）復活嘅。全球基督徒都會喺呢日舉行崇拜儀式，慶祝耶穌復活。所以喺歐美一啲地區嘅商店星期日會休息。不過部分基督教派，例如基督復臨安息日會，仍然以星期六為安息日。

至於信仰伊斯蘭教嘅地區，就以聚禮日（主麻日），亦即星期五為和平、慈悲之日，亦係休息日。據《古蘭經》第62章（主麻章）記載，「歸信的人們！當聚禮日召人禮拜的時候，你們應當趕快去記念安拉，放下買賣，那對於你們是最好的，如果你們知道。禮拜完畢的時候，你們當散佈在地方上，尋求安拉的恩惠，你們應當多多記念安拉，以便你們成功。」（第9—10節）

目前世界上大部份國家，包括中國內地、臺灣、同澳門，都實行五天工作制，臺灣稱之為「週休二日」。不過香港只有星期日係公眾假期，如果星期六係公眾假期，就唔會補假。中東部份國家過去休星期四、五，不過都已經改為星期五、星期六休息，以便與全球同步。伊朗同巴勒斯坦只休星期五。而巴基斯坦、黎巴嫩、土耳其、突尼西亞同摩洛哥同西方國家一樣，星期六、日休息。

喺東南亞，以穆斯林為主、實行聯邦制嘅馬來西亞，各州都有權自訂休息日。目前柔佛、登嘉樓、吉蘭丹、吉打四州休星期五、六，其他州屬休星期六、日。印尼休星期六、日，但亞齊省同另一個伊斯蘭國家汶萊，就休星期五同星期日。

下次我會再同大家分享吓公共假期嘅情況。

話到尾，2022年就快嚟到啦，咁你又準備好安排你來年嘅假期未呀？如果仲未，不妨參考吓「2022年請假攻略：澳門篇」啦！