尋日喺內港柏港停車場掘出一台大炮。好多人話澳門街掘路掘咗咁多年，終於有掘到寶嘅一日！

奇就奇在，喺呢個位置，文獻並無記載有炮台存在過。至於呢支炮點會喺呢個位置，相信要交由專家研究啦！

其實你又知唔知澳門有幾多座炮台呢？一共有十六座咁多！佢哋分別係：大家最熟悉嘅大炮台、松山上嘅東望洋炮台，呢兩座都係澳門歷史城區嘅一部分。其他現存嘅炮台有望廈炮台、燒灰爐炮台、嘉思欄炮台、西望洋山炮台、竹仔室炮台同媽閣炮台，大部分都已經改建。至於仁伯爵炮台 、伯多祿炮台、沙梨頭炮台、青洲山炮台、馬交石炮台同臘一炮台就因拆卸已經消失咗。另外氹仔同路環都各有一座炮台。

其實澳門喺17世紀20年代之前，係一個不設防的城市。但係由於荷蘭人曾經試圖入侵澳門，喺明朝嘅默許下，澳門亦都開始修築自己嘅防禦工事。以大炮台為中心，先以城牆連接澳門東西兩岸，並喺南灣再修築炮台，再用城牆連接炮台與炮台之間，監視海面上嘅動靜。

炮台除咗有防禦、儲存槍械彈藥，甚至食水嘅功能，亦需要架設大炮，作為實際嘅武器之用。澳門早期嘅炮台，例如大炮台，上面嘅大炮都係向着南方。澳葡政府19世紀中期開始對澳門實施殖民管治，新嘅炮台大炮嘅坐向就對住北方，瞄準中國內地。大家去大炮台同望廈炮台參觀嘅時候不妨留意吓！