唔知大家去長途旅行，會鍾意乘坐咩交通工具穿州過省呢？

喺美加，除咗飛機以外，長途大巴一直都係好多人出遠門嘅方式。不過喺加拿大，有九十多年歷史嘅灰狗巴士上星期四（5月13日）宣佈永久結束除美加跨境服務以外當地嘅所有業務，只維持美加兩地之間嘅跨境服務。美國公司營運不受影響。

自2019年10月底起，受廉航、鐵路及公營巴士服務等競爭者衝擊，以及私人汽車數量持續增加等因素影響，灰狗巴士已經結束喺加拿大西部嘅所有路線，只剩低安大略同魁北克兩省嘅服務。而受疫情打擊，所有客運服務已經喺舊年5月起暫停至今。