好多港澳朋友都將日本視為第二個故鄉。可惜疫情喺日本仍未緩和，如果想趁十一假期一解「思鄉之情」，最近嘅地方可能係……出關兩個鐘車程嘅佛山？

最迎有日本網民發現喺佛山出現咗一條模仿日本街頭嘅「一番街」，入面嘅招牌、街道牌、燈籠、過路處等，讓人好似置身東京鬧區。不過細留意走馬燈嘅字體，以及行左軚嘅的士，仍然提醒大家呢度係中國！

一番街
地址：佛山市南海區大瀝鎮黃岐建設大道中星港城

另外喺順德，原訂年初開幕、由日本建築師安藤忠雄設計嘅「和美術館」將於十一國慶節試業。

美術館總面積約為16,000平方米，其中展廳面積約8,000平方米。通過運用清水混凝土作為建築材料，安藤忠雄將光、水、風等自然元素融入到這座具有嶺南建築文化意境的美術館中。

據館方介紹，建築從細部到整體構成，甚至包括景觀設計，都如同水面波紋一樣，層層展開。而中心係圓筒狀五層挑空嘅空間。雙重螺旋樓梯盤旋而下，形成中央圓形空間。如同DNA結構嘅雙螺旋清水混凝土樓梯，相信係館內一大「打卡點」。

另外，美術館設有夾岸花園，其動線暗含了曲徑通幽嘅意境。弧形嘅清水混凝土隔牆喺園中有序地分佈、環繞，配合多種精心選植嘅粉色系開花喬木，使觀眾恍如「夾岸數百步，忽逢桃花林」般暢遊於詩意之中。

美術館首個展覽「世間風物——和美術館開館大展」，將探討人類文明喺自然規律中嘅處境，關注生存環境嘅具體性，審視現代化過程中所導致嘅人與物、人與自然等生態系統嘅相關性，以及區域性文化嘅傳承和可持續性發展等問題。展覽喺呢個時候開幕，相信別具意義。

和美術館
地址：佛山市順德區北滘新城怡興路6號
開放時間：
週二至周日 10:00-18:00（17:30停止入場）
週一閉館（遇法定節假日閉館時間順延至節後第一個工作日）
* 2020年10月1日 10:00-15:00（14:30停止入場）
* 每月20日為免費公眾開放日（遇閉館日順延至下一個自然日）
預約管道：和美術館官方微信公眾號預約購票。