早前濠記提過布吉七月起將重新向外國遊客開放。當中細節如何？今期將會為大家詳細分析。

泰國自今個月一號開始就已經放寬外國人入境政策。目前准許入境的11類人士，如果已經完成接種新型肺炎疫苗，隔離期將會由14日縮短至7日。

而泰國國家旅遊局將會喺今年第二、三、四季分三階級重開國際旅遊。首先喺四月至六月的第一階段，已經接種疫苗的外國人喺政府指定設施完成7日隔離後就可以喺國內其他地區旅行。隔離期間，旅客可以享用酒店內設施，亦可以喺遊客選定嘅入境地指定範圍內參與戶外活動。

第二階段，正如之前所講，布吉將重新開放觀光。頭七日需要喺布吉指定地區旅遊，之後就可以去全國其他地區。除咗布吉之外，已經接種疫苗嘅旅客亦可以前往喀比、攀牙、蘇梅島、芭提雅同清邁，但需要按第一階段模式就地隔離7日。

到第四季，上述五個地區都會按照布吉模式開放。

但無論係喺邊一個階段，入境旅客都需要進行核酸測試並下載警示程式，亦需要持有有效簽證、由使領館發出嘅入境證明書、指定隔離（ASQ）酒店訂房單，購買保額至少10萬美元醫療保險，並持有入境72小時內核酸陰性報告。

至於疫苗注射方面，泰國要求遊客喺出發前至少14日完成疫苗注射，而疫苗須要係當地衛生部或者世衛認可嘅品種。而出現變種病毒疫情國家嘅遊客仍然禁止入境。至上月底已經獲得認可嘅疫苗包括科興、阿斯利康、輝瑞/Biontech、莫德納、強生，以及由印度研發嘅Covishield。