今日係2022年2月22日，星期二，農曆正月廿二，簡寫係22/2/22。今日年、月、日都由2字組成，相當完美。相信以我哋人目前嘅壽命嚟講，亦可能係唯一一次。因為下一個由咁完美嘅數字組成嘅日期，會係2222年2月22日，即係兩百年後啦！而且當日會落喺星期五，可以話係「有今日無來世」！

今日喺日本，亦都係一個好有趣嘅日子，就係當地嘅「貓之日」（猫の日）啦！至於點解係2月22日號慶祝呢？原來係日語「二」字（に/ni）讀音同「貓」（ニャン/nyan）字類似。而今日係2022年2月22日，更被視為係「超級貓之日」！而且今年仲要係虎年（大貓），仲唔係「至尊貓之日」？

除咗日本有「貓之日」外，世界各地不同國家都有紀念貓嘅日子，例如加拿大喺8月8日慶祝「國際貓日」，而美國就喺10月29日「國家貓日」。而喺義大利就有11月17日「黑貓節」，希望大家改變認為黑貓係不祥象徵嘅舊有觀念，愛護黑貓，停止殺害黑貓。

喺比利時，每三年五月第二個星期日（即係母親節）喺當地城鎮伊帕爾（Ieper）竟然有「掟貓節」（Kattenstoet）。當地過去係以呢絨生產聞名，以前啲人養貓嚟驅除老鼠，但貓過度繁殖，要掟貓落鐘樓解決問題，亦有話係同中世紀嘅迷信有關，認為貓同女巫有關。而家當然唔會掟真貓落嚟，改為掟貓玩具代替。當日市面仲要擺上各種貓裝飾，以及舉辦貓花車巡遊。上次「掟貓節」喺2018年舉行。

咁唔知各位貓奴，今日又會點樣同你嘅「主人」慶祝呢？