日本尋日宣佈咗新天皇採用嘅年號為「令和」，好多人都熱烈討論年號嘅來源同埋含意。由於日本同中國嘅複雜關係，版主基於求真精神，做咗啲資料搜集，先寫呢一篇帖文。

首先，「令和」二字，和字可以表示「和平」，亦係日本主要民族嘅自稱「大和」。而令字除咗代表「命令」，亦有「美好」嘅意思，例如成語「巧言令色」，「令」喺呢度如果唔係指「美好」，意思係會對唔上嘅。

正如大家所知，「令和」嘅典故係《萬葉集》嘅「初春令月，氣淑風和」，係日本第一次唔用中國典籍作為天皇年號。之前天皇嘅年號，唔係《史記》，就係《尚書》一類儒家經典。

《萬葉集》雖則係日本最早嘅詩集，但你打開一本《萬葉集》（當然係日文版啦），會發現有啲句子一般華人會睇得明（「初春令月」一句就屬於呢一種），而其他部分都係漢字，但讀落就好似天書咁。

咁係因為正文只係用漢字嚟標示日文發音，已經脫離咗中文嘅意思，即「萬葉假名」，係我哋熟悉嘅「平假名」同「片假名」嘅祖先。《萬葉集》成書於八世紀，係日本學習唐朝嘅高峰期，而且在理嚟講，外來文化由照抄、適應到自創都係需要過程嘅。

另一方面，好多人都已經發現相關詞句喺中國好多古典文獻都有，例如東漢張衡嘅《歸田賦》：「於是仲春令月，時和氣清」，而「氣淑風和」就有可能化用自東晉王羲之《蘭亭集序》：「天朗氣清，惠風和暢」。咁亦唔出奇，畢竟日本、朝鮮半島、越南等都係漢字文化圈嘅成員，但文化上後來都各自發展。日本首相安倍晉三喺記者會上話新年號「蘊含了在人們的美麗心靈相互靠近之中，文化誕生並成長的意思」，可謂係最好嘅註腳。

而實際嚟講，今次唔係天皇駕崩導致更改年號，有條件提前公佈新年號。但好有趣嘅係，根據共同社報道，日本保守派反而唔贊成咁做，怕有新舊天皇出現「雙重權威」嘅問題，最終安倍晉三以實用為主，決定尋日公佈新年號。

無論如何，新年號象徵住新時代嘅來臨，好多嘢，例如日曆、錢幣、電腦系統等，都需要跟住變，「平成」將會活在人們嘅記憶當中。日本天皇喺日本憲法下、作為「國民統合」嘅象徵，相信亦都係唔會改變嘅。希望日本喺新天皇帶領下，能繼續同其他國家，特別係亞洲鄰國，維持和平友好嘅關係。

（圖片來源：維基共享資源）