氣象局預料本澳今晚起開始降溫，大除夕低溫預測下調至最低攝氏九度。不過到大年初一天氣將會由濕凍轉為乾凍，日夜溫差較大。

繼續閱讀 本澳氣溫今晚開始下降 大年初一濕轉乾 大除夕低溫下調至九度 →

今日係臘月十七日。尋日食完尾禡（粵音讀牙），農曆新年正式進入倒數階段啦！

新一年（壬寅虎年）大年初一係喺下個月一號，好易記。不過當大家睇一睇日曆，之前嗰一日係1月31日。無問題呀！但點解嗰日上面寫住「廿九」，明明大除夕係年三十㗎？年三十呢？

原來「都是月亮惹的禍」！中國傳統嘅農曆，係根據月亮圓缺循環去計算一個月有幾多日，天文學稱之為「朔望月」（初一新月為朔，十五滿月為望）。由於月球、地球、太陽之間嘅相對運動並非一成不變，所以每個「朔望月」周期都唔係固定嘅，最短29日6小時，最長29日19小時。為咗方便，農曆月份就被分為30日嘅大月同29日嘅小月。

而今年臘月係小月，所以只有29日，亦就無咗年三十啦。除夕就喺年廿九。

不過臘月無年三十唔係第一次發生，一般三到五年就會出現一次，有時甚至會連續幾年出現，例如2003、2006、2013、2016呢四年都係無年三十，而2025年開始到2029年仲會連續五年無年三十。

除咗牛年少咗大年三十之外，即將到來嘅壬寅虎年亦都只有355日。原來喺農曆，平年同閏年嘅計算方法同國際通用、以太陽公轉周期為根據嘅公曆係有分別嘅。公曆原則上係每四年置一閏日，即係2月29日。而農曆係置一閏月，所以平年一年有12個月，每月平均29.53日，每年有354至355日，而閏年有13個月，一年大約384日，而兩者相差10至11日。

中國古代曆法家通過推算發現，只要每19年置七個閏月，就可以好好彌補農曆年同太陽公轉周期嘅偏差。

至於點樣決定邊個月要重覆一次呢？由每年冬至開始數，當某個月不包括以下十二個節氣（中氣）當嘅任何一個，咁嗰個月就會被訂為閏月。

舉個例，2017年係丁酉雞年，當年農曆六月後嘅一個月，即係公曆2017年7月23日至8月21日，中間只有「秋分」，並無「大暑」以及「處暑」呢兩個節氣，咁呢一個月就係「閏六月」。

到呢度大家可能會好奇，如果有「閏正月」，會唔會有得過兩次農曆年呢？「閏正月」係有嘅。不過下一次「閏正月」就要到600年後嘅2622年啦！到時大年初一喺公曆1月20日，正月有三十日，正月三十咁啱又踏正「雨水」節氣。之後一個月係小月，只有廿九日，中間嘅節氣只有驚蟄，而春分喺正再下一個月嘅初一。所以呢一日就係「閏正月」。

（央視新聞客戶端）